भांगरभूंय | प्रतिनिधी
सिरोही, खबरां संस्था ः राजस्थानांत सामुहीक बलात्काराची धक्को दिवपी घडणूक घडल्या. हांगाच्या सिरोही नगरपरिशदेचे अध्यक्ष आनी नगरपरिशदेच्या आदल्या आयुक्तांचेर 20 बायलांचेर सामुहीक बलात्कार केल्ल्याचो आरोप आसा. तांणी बायलांक आंगणवाडींत नोकरी दिवपाचे हांयस दाखोवन तांचेर अत्याचार केल्ल्याचो दावो आसा. ह्या प्रकरणांत गुन्यांव नोंद केला.
नेमके प्रकरण कितें?
दोन दुबावितांनी सुमार 20 बायलांचेर आंगणवाडींत नोकरी दिवपाचे हांयस दाखोवन सामुहीक बलात्कार केल्ल्याचो आरोप जाला. ही घडणूक पाली जिल्ह्यांत घडली. हांतूतले एके बायलेन पुलिशेंत कागाळ केले उपरांत ही घडणूक उजवाडाक आयली. दुबावितांनी अत्याचार करतना व्हिडियो रेकॉर्डिंग केल्ल्याचोय आरोप बायलेन केलो. व्हिडियो व्हायरल करपाची धमकी दिवन तांणी पांच लाख रुपया मागले. म्हजे वांगडाच हेर 20 बायलांचेरुय अत्याचार जाला अशें कागाळदार बायलेन म्हणलां.
जेवणात गुंगीचे वखद दिवन अत्याचार
दाखल केल्ले कागाळी प्रमाण कागाळदार बायल हेर बायलां सयत कांय म्हयन्यां आदीं आंगणवाडींत काम करपाक सिरोहीक गेल्ली. थंय कागाळदार बायलेची दुबावितां कडेन वळख जाली. तांणी बायले खातीर जेवण आनी रावपाची वेवस्था केली. म्हाका दिल्ल्या जेवणांत गुंगीचे वखद घालताले. उपरांत हांव बेशुध्द जाले उपरांत म्हजेर लैंगीक अत्याचार जाल्ल्याचें बायलेन कागाळींत सांगलां.
बायले कडल्यान खोटी कागाळ?
मजगतीं, पुलीस अधिकारी पारस चौधरी हांणी ह्या प्रकरणांची चड म्हायती दिली. चौधरी हांच्या दाव्या प्रमाण कथित पीडित बायलेन पुलिशेंत बोगस कागाळ केल्ली. पूण आठ बायलांनी याचिका दाखल केल्या उपरांत राजस्थान उच्च न्यायालयान गुन्यांव नोंद करून ह्या प्रकरणाची चवकशी करपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
