भांगरभूंय | प्रतिनिधी
भांगरभूंय । खेळां मेज
पणजीः सुरतांत सुरू आशिल्ल्या रणजी क्रिकेट सर्तींत रेल्वे आड गोंयांक जैताची संद आसा. सर्तीच्या आयच्या निमाण्या दिसा तांका जैता खातीर 213 धांवड्यांची गरज आसा आनी तांचे कडेन 9 विकेटी बाकी आसात. ह्या मॅचीचो निकाल लागतोलो हें निश्चीत आसा. गोंयच्या बॅट्समनांनी बरी बॅटींग केल्यारूच तांकां जैत मेळपाक शकतलें.
जैता खातीर 306 धांवड्यांचें आव्हान स्विकारून तिसऱ्या सत्रांत आपलो दुसरो डाव गोंयान सुरू केलो. खेळ सोपलो तेन्ना अमोघ देसायाची विकेट दिवंन गोंयांत 93 धांवड्यो केल्यात. सुय़श प्रभुदेसाय 54 धांवड्यांचेर खेळटा. ताणे 88 बॉलांत 3 चौके आनी 4 सके मारले. स्नेहल कवठणकार (नाबाद 23) ताका वांगोड दिता. गोंयाच्यो 35 धांवड्यो जाल्ल्यो तेन्ना अमोघ देसाय आवट जालो. सुयश आनी अमोघान दुसऱ्या विकेटी खातीर आतां मेरेन 58 धांवड्यांची भागिदारी केल्या.
रेल्वेन कालच्या नाबाद 31 वयल्यान आयतारा सकाळीं आपलो दुसरो डाव फुडें सुरु केलो मात ते फकत 208 धांवड्यो करपाक शकले. सकाळच्या सत्रांत बरी बॉलींग करून लक्षय गर्ग आनी हेरंब परबान दरेकी दोन विकेटी घेतल्यो. प्रथम सिंग आवट जाल्या उपरांत रेल्वेची स्थिती 5 आवट 85 अशी जाल्ली. उपरांत आशुतोष शर्मान (93 बॉलांत 8 चौके आनी 3 सक्यांनी 81) आकर्शक फटकेबाजी करून रेल्वेक 200 धांवड्यांचो टप्पो मेळोवन दिलो. गोंयां खातीर दर्शन मिशाळान 4, लक्षय गर्ग आनी हेरंब परबान दरेकी दोन आनी मोहीत रेडकारान एक विकेट घेतली.
थोड्या भितर स्कोर- रेल्वे पयलो डाव 297. गोंय पयलो डाव 200. रेल्वे दुसरो डाव 208 (विवेक सिंग-21 सूरज आहुजा- 21, प्रथम सिंग-28, मोहम्मद सैफ 5, उपेंद्र यादव-0, साहब युवराज सिंग- 34, आशुतोष शर्मा – 81, युवराज- 0, आकाश पांडे 5, हिमांशू सागवान- नाबाद 1 बॉलींग- लक्षय- 16 – 2 – 53 – 2, मोहीत रेडकार- 11 – 2- 40-1, दर्शन मिशाळ- 16-3-44-4. गोंय दुसरो डाव- 31 ओव्हरींत 1 आवट 93. (सुय़श प्रभुदेसाय- नाबाद 54, अमोघ देसाय- 13, स्नेहल कवठणकार नाबाद- 23. आकाश पांडे 29 धांवड्यांत 1 विकेट)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
