भांगरभूंय | प्रतिनिधी
खबरां संस्था
एडिलेडः तीन मॅचींच्या टी-20 माळेंत ऑस्ट्रेलियेन दुसरे मॅचींत वेस्ट इंडिजाक 34 धांवड्यांनी हारावोन 2-0 अशी माळ आपल्या बोल्सांत घातली. ऑस्ट्रेलियन पंगडान पयलीं खेळून 20 ओव्हरींत 4 आवट 241 धांवड्यो करून वेस्ट इंडिजाक जैता खातीर 242 धांवड्याचें लक्ष्य दिलें. ताचो फाटवाव करतना वेस्ट इंडिज 9 विकेटी वोगडान फकत 207 धांवड्यो करपाक शकलो.
ऑस्ट्रेलियेचो अश्टतासी ग्लेन मॅक्सवेलान नाबांद 120 धांवड्यो केल्यो. त्या भायर टीम डेव्हीडान 31 आनी मिचेर मार्शान 29 धांवड्यो केल्यो. वेस्ट इंडिजा खातीर जेसन होल्डरान सगल्यांत चड 2 विकेटी घेतल्यो. मॅक्सवेलान टी-20 आंतरराष्ट्रीय सर्तींत आपलो पांचवो शेकडो केलो. त्याच वांगडा ताणे भारताचो कॅप्टन रोहीत शर्माच्या शेंकड्यांची बरोबरी केली. मॅक्सवेलान सगल्यांत फास्ट शेंकडो करपाचो विक्रम आपल्या नांवार केलो. मॅक्सवेलान पांच शेंकडे करपाक 102 जाल्यार रोहितान 151 मॅची खेळच्यो पडल्यो. एडिलेट ओव्हल स्टेडियमाचेर मॅक्सवेलान 55 बॉलांत 12 चौके आनी 8 सके मारून नाबाद 120 धांवड्यो केल्यो. डेव्हिडान 14 बॉलांत दोन चौके आनी दोन सक्यांनी 31 धांवड्यो केल्यो. वेस्ट इंडिजाच्या होल्डरा शिवाय रोमारियो शेफर्ड आनी अल्जारी जोसेफान दरेकी एक विकेट घेतली.
242 धांवड्यांचो फाटलाव करतना वेस्ट इंडिजाची सुरवात बरी जाली ना. ब्रँडन किंग 5 धांवड्यांचेर रनआवट जालो. कॅप्टन रोवमन पॉवेलान 36 बलांत 5 चौके आनी 4 सक्यानी सगल्यांत चड 63 धांवड्यो केल्यो. आंद्रे सरेसना 4 चौके आनी 2 सक्यांनी 37 धांवड्यो केल्यो. ऑस्ट्रेलिये वतीन मार्कस स्टोयनिसातन 3 विकेटी घेतल्यो. स्पेंसर जॉनसन आनी जोश हेजलवुडान दरेकी 2 विकेटी घेतल्या. बाकीच्या विकेटी बेहरेनडॉप्र आनी अॅडम झम्पाक मेळ्ळ्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
