भांगरभूंय | प्रतिनिधी
पणजी, प्रतिनिधी : राज्यांत २०१९ ते २०२३ हीं पांच वर्सां खून, बलात्कार, दरोडो, जिवघेणे हल्ले, जुगार, अपघातांत मरण, चोरी, घुंवळे वखदां तस्करी अश्या गुन्यांवांनी वांटो आशिल्ल्या आड ३६२ गुन्यांव दाखल केल्यात. हांतले पांच गुन्यांव नेण्ट्यां चलयांचेर बलात्कार केल्ले आसात. ३०१ गुन्यांव ड्रग्ज तस्करी प्रकरणांत दाखल जाल्यात. सगळ्यांत चड २३१ गुन्यांवांत नायजेरियन नागरिकांचो आसपाव आशिल्ल्यान हे गुन्यांव दाखल केल्यात, कुडतरचे आमदार आलेक्स रेजिनाल्ड हांणी विचारिल्ल्या प्रस्ना जाप दितना अशी म्हायती मुख्यमंत्री डॉ. प्रमोद सावंत हांणी विधानसभेंत लेखी जापेंत दिली.
ते प्रमाण विदेशी नागरीक गुन्यांवकार आशिल्ल्यान २०१९त १०५, २०२०-७२, २०२१-४४, २०२२-७२, जाल्यार २०२३त ६९ गुन्यांव मेळून ३६२ गुन्यांव नोंद जाल्यात. हातूंत ड्रग्ज प्रकरणांत १५२, खून प्रकरणांत तीन, बलात्कार प्रकरणांत ९ गुन्यांव दाखल जाल्यात. हातूंत नेण्ट्यां चलयांचेर बलात्कार केल्ल्या प्रकरणांत पांच गुन्यांव दाखल जाल्यात. जाल्यार जिवघेणे हल्लो प्रकरणांत २, चोरी प्रकरण ९, फटींगपणांच्या प्रकरणांत २१, जाल्यार व्हिझा नेम मोडिल्ल्याचे आनी हेर विदेशी कायदो, अपघाती मरण आनी हेर अपघात प्रकरणां तशेंच हेर भारतीय दंड संहिता, विदेशी कायदाच्या विविध कलमां खाला मेळून विदेशी नागरिकांचेर ३६२ गुन्यांव नोंद केल्ल्याची म्हायती लेखी जापेंत नोंद केल्या.
वयर दाखल जाल्ल्या गुन्यांवांत सगळ्यांत चड १२१ गुन्यांव नायजेरियन नागरिकांचेर जाल्यात. उपरांत ४८ रशियन, नेपाली, बंगलादेशी, केनिया, युगांडा आनी हेर नागरिकांचेर मेळून ३६२ गुन्यांव दाखल जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
