भांगरभूंय | प्रतिनिधी
म्हापशें, प्रतिनिधी : आसगांवां बावरी रेस्टॉरंटाच्या लॉकरांतल्यान २.२५ लाख रुपया घेवन पळ काडिल्ल्या दुबावीत आशिश प्रताप सिंग (२२, उत्तर प्रदेश) ह्या कॅशियराक हणजूण पुलिसांनी ग्रेटर नोएडाच्यान अटक केली.
ही चोरयेची घडणूक फाटल्या ५ ऑक्टोबर २०२३ दिसा रातच्या ८.३० वरांचेर घडिल्ली. ह्या प्रकरणांत १३ ऑक्टोबराक रेस्टॉरन्टाचे धनी प्रणय मेहरा हांचे वतीन मॅनेजर अभिषेक शेट्टी हांणी पुलिशेंत कागाळ केल्ली. ते प्रमाण पुलिसांनी दुबाविता आड गुन्यांव नोंद केल्लो. दुबावीत ह्या रेस्टॉरंटांत कॅशियर म्हणून कामाक आशिल्लो. घडणुके दिसा दुबावितान रेस्टॉरन्टाचे सेफ लॉकर उघडलें आनी तो भितरले २.२५ लाख रूपया घेवन गायब जालो. दुबावीत ग्रेटर नोएडा हांगा आशिल्ल्याची म्हायती मेळटांच थंयच्या थळाव्या पुलिसांचे मजतीन दुबाविताक धरून ताका अटक केली. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
