भांगरभूंय | प्रतिनिधी
नवी दिल्ली, खबरां संस्था: सध्या देशांतल्यो रेल्वे इलेक्ट्रीक आनी डिझेल इंजिनाचेर चलतात. फुडाराक मात हातूंत बदल घडूं येता. इलेक्ट्रिक इंजिनां बदला आतां हायड्रोजनाचेर चलपी इंजिनां विकसीत करपाचें काम सुरू आसा. अशें संसदेच्या अर्थसंकल्पीय अधिवेशनांत रेल्वे, इलेक्ट्रॉनिक्स आणि म्हायती तंत्रज्ञान मंत्री अश्विनी वैष्णव हांणी लोकसभेंत सांगलें.
आमी बेगीनूच हायड्रोजन इंधन सेलाचो वापर करून रेल्वे चलोवपाक येसस्वी जातलीं. वैष्णव हांणी संसदेंत विचारिल्ल्या प्रस्नाक जाप दितना सांगलें, आमी ह्या अभिनव प्रकल्पा विशीं उत्सूक आसात. सध्या तो पायलट प्रोजेक्ट म्हणून हातांत घेतला. हायड्रोजन फ्युएल सेल तंत्रज्ञानान केल्ले ट्रेनीचें उत्पादन इंटिग्रल कोच फॅक्टरी चेन्नय हांगा करतले.
वैष्णव हांण फुडें सांगलें, हायड्रोजनाचेर चलपी रेल्वे प्रकल्प शाश्वत येरादारी समस्या सोडयतली.
शून्य कार्बन टार्गेटाचेर रेल्वे काम करता
२०३० मेरेन कार्बन उत्सर्जन शून्य करपा खातीर भारतीय रेल्वे नव्या तंत्रगिन्यानाचेर काम करता. रेल्वे पूल आनी स्टार रेटिंग वांगडा रेल्वे गाडयो वेळार चलपा खातीर अत्याधुनीक सुविधांनी सज्ज करपाचें काम चालू आसा. जाका लागून रेल्वे वेळार धांवतल्यो आनी इंधनाचेंय लुकसाण जावचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
