भांगरभूंय | प्रतिनिधी
म्हापशें, प्रतिनिधी ः बालाजीनगर -तेलंगणातल्यान आयतारा, 4 फेब्रुवारीक सकाळीं सुमार 9.30 वरांचेर गोंय भोंवडेर एक पंगड आयिल्लो. त्याच पंगडातल्या बापूय- पूतान वांगड्यांचो 7.70 लाखांचो म्हाल चोरून पळून गेले. दुबावीत बापूय गंडी रामचंद्र आनी पुत गंडी अरविंद स्वामी (आदर्शनगर, बालाजीनगर) अशी तांची नावां आसा. ह्या प्रकरणांत एम. प्रवीणकुमार हांणी कळंगुट पुलिशेंत कागाळ दाखल केल्या.
तेलंगणाच्या 11 जाणांचो पंगड शेनवारा 3 फेब्रुवारीचे रातीं गोंय भांवडेक गोंयांत आयलो. तातूंत ७ दादले आनी ४ बायलां आशिल्ली. ते कंळगुटेंतल्या एका हॉटेलांत रावले.
दर्यादेगेर न्हावप, बोटींग करप आनी कॅसिनोतल्या खेळांची मजा घेवप असो ह्या पंगडाचो प्लॅन आशिल्लो. 4 तारखेक सकाळीं हो पंगड बोटींग करपाक हॉटेलातल्यान भायर सरलो. तांकां व्हरपा खातीर हॉटेला भायर एक गाडी उबी आशिल्ली. हाचे आदीं पंगडातल्या फिर्यादी सयत पांच जाणांनी 5 लाख 90 हजार रुपया एकठांय करुन हॉटेलाच्या कुडींत सुरक्षित दवरपा खातीर दुबावित गंडी अरविंद स्वामी हांचे कडेन दिली. तशेंच पंगडांतल्या एका बायलेन 30 ग्राम वजनाचीं चार काकणां दुबाविता कडेन दिल्ली. हो म्हाल ताणें आपल्या बॅगात दवरलो.
सगळे बोटींग करपाक वचपाक हॉटेलां सकयल आयले तेन्ना दुबावीत बापूय आनी पूतान शौचालयांत वचपाचें नाटक केलें. बरोच वेळ जालो तरी ते परत आयले नात. देखून उरिल्लो पंगड हॉटेलाच्या रूमांत एक नदर मारपाक गेलो. तेन्ना रुमाक लॉक आशिल्ले. हॉटेलाच्या रिसेप्शनांचेर तांणी चवकशी केली तेन्ना दुबावीत हॉटेलाच्या फाटल्या दारांतल्यान पळून गेल्ल्याचे कळ्ळें.
ते उपरांत ह्या पर्यटकांनी कळंगुट पुलिशेंत कागाळ दाखल केली. इतलेंच न्हय तर ह्या गटांतल्या 9 जाणांनी पांच दीस दुबावितां कडेन संपर्क सादपाचो यत्न केलो. पूण, ताणें जाप दिवंक ना. तांच्या कडले सगळे पयशे चोरीक गेल्ल्यान तांका गोंय भोंवडी करपाक मेळ्ळी ना आनी निमाणे ते आयले तशेंच परते गेले. ताचे आदीं तांणी केल्ले विनंती प्रमाण पुलिसांनी वयल्या दुबावितां आड भा.दं.सं.च्या कलम 405 आनी 406 खाला गुन्यांव नोंद केला. पुलीस निरिक्षक परेश नायक हांच्या मार्गदर्शना खाला हवालदार संजय पेडणेकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
