भांगरभूंय | प्रतिनिधी
आमदार क्रुझ सिल्वा हांणी विचारिल्ल्या प्रस्नाचेर मुख्यमंत्र्याचे उत्तर
पर्वरी ः अर्थसंकल्पीय अधिवेशनाच्या आयज निमाण्या दिसा आमदार क्रुझ सिल्वा हांणी सभाघरांत प्रस्न काळांत रेंव संबंदी प्रस्न उपस्थित केलो. ताचेर नॅशनल इन्स्टिट्यूट ऑफ ओशनोग्राफीन दिल्ल्या अहवाला प्रमाण मांडवी, जुवारी, शापोरा हांगाच्यान रेंव काडपाक सुरवात जातली. ते खातीर लागपी गरजेच्यो सगळ्यो कायदेशीर प्रक्रिया पुराय करपाक देड म्हयनो लागतलो. तशेंच महाराष्ट्र आनी कर्नाटकांतल्यान येवपी कायदेशीर रेंव तशीच चालू उरतली. जाका लागून रेंवेंचे दर नियंत्रणांत उरतलें अशी म्हायती मुख्यमंत्री डॉ. प्रमोद सावंत हांणी आमदार सिल्वा हांणी विचारिल्ल्या प्रस्नाक जाप दितना दिली.
घर बांदपा खातीर सामान्य लोकांक रेंव मेळना. रेंवेंची फावो ती पुरवण करपा खातीर सरकारान खंयचे उपाय केल्यात? शेजारच्या राज्यांतल्यान व्हड प्रमाणांत रेंव हाडटात. ही रेंव आडावपा खातीर सरकारान कितें केला? हेर राज्यांतल्या रेंव पुरवणदारांक गोंयांत परवानगी आसा काय? तांचे कडल्यान सरकाराक कितली येणावळ मेळटा? अशेंय प्रस्न आमदार सिल्वान मांडले.
रेंवेंची गरज लक्षांत घेवन रेंव काडपाक सुरू करपा खातीर सरकारान रोखडेंच नॅशनल इन्स्टिट्यूट ऑफ ओशनोग्राफीक अभ्यास करून अहवाल सादर करपाचो निर्देश दिल्लो. ते प्रमाण मांडवी, जुवारी आनी शापोरा न्हंयांतल्यान पारंपरिक पध्दतीन रेंव काडपाक मेळटली असो अहवाल दिलो. आतां दोनूय जिल्होधिकाऱ्यांनी ह्या न्हंयांतल्यान योग्य रितीन रेंव काडपाक मेळची म्हूण पर्यावरण खात्याक अर्ज केला. सुमार देड म्हयन्यांत कायदेशीर प्रक्रिया पुराय जातली. ते उपरांत राज्यांत कायदेशीर रेंव काडपाक सुरवात जातली अशें मुख्यमंत्री डॉ. सावंत हांणी ह्या वेळार सांगलें. फुडल्या दोन म्हयन्यांत कांय न्हंयांनी गाळ पडटलो. ही रेंव सरकार पुरवणदारांक विकतली. हाका लागून फुडले दोन म्हयने रेंवेंचे दर स्थीर उरतले अशें तांणी सांगलें.
हेर राज्यांतल्यान येवपी रेंव चालूच उरतली. ताका लागून राज्यांतले रेंवेंचे दर नियंत्रणांत उरतले. ह्या रेंव पुरवणदारां कडल्यान सरकार दर मेट्रीक टनाक 600 रुपया घेता. हातूंतल्यान सरकाराकूय येणावळ मेळटा अशें मुख्यमंत्र्यान आयज सभाघरांत स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
