भांगरभूंय | प्रतिनिधी
पर्वरी ः सरकारी जमनी वयली बेकायदेशीर घरां कायदेशीर जातलीं. ते खातीर बेगीनूच सर्वेक्षण जातलें. थारावीक काळा खातीर सरकारी जमनीचेर उबारिल्ल्या अनधिकृत घरांक आलाशिरो दिवपाची गरज आसा अशी म्हायती महसूलमंत्री बाबूश मोन्सेरात हांणी आयज दिली.
राज्यांतल्या सरकारी जमनीचेर बेकायदेशीर घरां आनी अतिक्रमण बांदकामांची वळख करपा खातीर सरकारान कसलोच सर्वेक्षण केल्लो ना. मजगतीं, सरकारी जमनी वयली बेकायदेशीर बांदकाम नियमित करपा खातीर 789 जाणांनी अर्ज केल्ल्याची म्हायती महसूल मंत्री मोन्सेरात हांणी आयज विधानसभेंत बरयल्ल्या जापेंत दिली. केपेंचें आमदार एल्टन डिकॉस्टा हांणी हे विशीं विधानसभेंत प्रस्न मांडिल्लो. ह्याच विशया संबंदी पत्रकारांनी विधानसभे भायर मंत्री मोन्सेरात हांका एक प्रस्न विचारलो. ताचेर तांणी थारावीक काळा मेरेनची घरां कायदेशीर करतले अशें सांगलें. सरकारी जमनीवयली बेकायदेशीर घरां आनी अतिक्रमण बांदकामांची वळख करपा खातीर सरकारान कसलोच सर्वेक्षण केल्लो ना. आतां बेगीनूच हे विशीं सर्वेक्षण करपाक घेतले अशी म्हायती तांणी दिली.
मजगतीं, सगळ्यांत चड दिवचल तालुक्यांतल्या 212 जाणांनी बेकायदेशीर घरां आनी बांदकाम नियमित करपा खातीर अर्ज दाखल केल्यात. जाल्यार बार्देस तालुक्यांत 92, तिसवाडी 39, केपें 22, सत्तरी 16, पेडणें 10 जाणांनी अर्ज केल्यात. हे संदर्भात संबंदीत उपजिल्होधिकाऱ्यांच्या कार्यालयांत जमा केला. जाल्यार कोमुनिदादतल्या सरकारी जमनीचेर आशिल्ल्या मदीं वेळगें कोमुनिदाद वाठारांत सगळ्यांत चड 116 नियमित करपाचे अर्ज केला. उपरांत शिरसय 83, नास्नोळा 53, म्हापशें 16, आस्नोडा 12, बस्तोडा 25, काणका 7, कोलवाळ 6, मयडे 23, नावेली 10, खोर्ली 40 आनी बोर्डे कोमुनिदाद वाठारांतली 7 बांदकामां नियमित करपा खातीर अर्ज दाखल केल्यात अशी म्हायती मंत्री मान्सेरात हांणी आपल्या बरयल्ल्या जापांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
