भांगरभूंय | प्रतिनिधी
रिसॉर्टाच्या हेड अकावटंटा आड गुन्यांव नोंद
म्हापशें: कांदोळे सोनेस्टा इन्स ह्या रिसॉर्टाच्या अकावटांत 1.27 कोटी रुपयांची अफरातफर करपाचो प्रकार घडलो. ह्या प्रकरणांत कळंगूट पुलिसांनी रिसॉर्टाचो हेड अकावटंट दुबावीत शाबाजी सावंत (हरवळें, सांखळी) हाचे आड गुन्यांव दाखल केला.
दुबाविता कडल्यान हो अप्रामाणीकपणा आनी गैरवेव्हाराचो प्रकार फाटल्या 28 डिसेंबर 2012 ते 11 ऑगस्ट 2023 ह्या 11 वर्सांच्या काळांत घडला. ह्या प्रकरणांत सोनेस्टा इन्स प्रा. लि. कंपनीचे संचालक एडगर आफोन्सो हांणी पुलिशेंत बुधवारा 7 फेब्रुवारीक कागाळ दिल्या. त्या आदाराचेर पुलिसांनी हो गुन्यांव नोंद केला.
वयले कंपनीन दुबावीत आरोपीक कांदोळेंतल्या आपल्या रिसॉर्टांत हेड अकावटंट म्हूण नोकरेचेर दवरून ताचे कडेन रिसॉर्टाचें बँक खातें, वेवस्थापनाची जापसालदारकी सोंपयिल्ली. पूण ताणें अप्रामाणीकपणा दाखोवन अफरातफर केली.
फाटल्या ऑगस्ट 2023 वर्सा कंपनीक रिसॉर्टाच्या बँक खात्यांत गैरवेव्हार जायत आशिल्ल्याचो दुबाव आयिल्लो. ते प्रमाण कंपनीन रिसॉर्टाच्या सगल्या बँक खात्यांचें ऑडीट केलें. हातूंत 1 कोटी 27 लाख 61 हजार 153 रुपया रकमेचो गैरवेव्हार जाल्ल्याचें दिसून आयलें.
कळंगूट पुलिसांनी ह्या प्रकरणांत दुबावीत आरोपी आड भादंसंच्या 408 आनी 418 कलमा खाला गैरवेव्हाराचो गुन्यांव दाखल केला आनी फुडलो तपास पुलीस निरिक्षक परेश नायक हांच्या मार्गदर्शना खाला उपनिरिक्षक अक्षय पार्सेकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
