भांगरभूंय | प्रतिनिधी
दुबावितांच्या बडबडीची सुलूस लागिल्ल्यान धिल्लन सतर्क
म्हापशें: इन्स्टाग्रामाचेर जाळ्यांत आडकल्ल्या नरोत्तम सिंग उर्फ निम्स धिल्लन (77, मार्रा-पिळर्ण, मूळ पंजाब) हांकां आपत्तीजनक अवस्थेंत हाडून तांचो व्हिडियो तयार करप आनी उपरांत तांकां ब्लॅकमेल करपाचो डाव दुबावीत नितू राहुजा (22, भोपाळ) आनी जितेंद्र साहू (32, भोपाळ) हांचो आशिल्लो. पूण हें फळादीक जावंक नाशिल्ल्यान दुबावितांनी धिल्लन हांचो खून करून आनी हें प्रकरण दरोड्यांतल्यान घडलें अशें भासोवपाचो यत्न केलो.
फाटल्या 4 फेब्रुवारी दिसा मार्रा-पिळर्ण हांगा रावत्या व्हिलांत निम्स धिल्लन ह्या हॉस्पिलिटी वेवसायिकाचो खून जाल्लो. ह्या प्रकरणांत पर्वरी पुलिसांनी दुबावीत आरोपी नितू राहुजा आनी जितेंद्र साहू ह्या दोगांक अटक केल्या आनी सद्या ते पुलीस कोठयेंत आसात.
घडणुकेच्या देड म्हयन्यां पयलीं मयत निम्स धिल्लन हांच्या इन्स्टाग्रामार दुबावीत आरोपी नितू राहुजा ही संपर्कांत आयिल्ली. तेन्ना सावन तांची वळख जाली आनी तीं एकामेकां कडेन चॅटींग करतालीं. ह्याच वेळार नितूक धिल्लन हे खूब गिरेस्त आसात आनी ते एकलेच रावतात अशें दिसून आयलें.
मयताचो आपत्तीजनक व्हिडियो काडून उपरांत तांकां ब्लॅकमेल करून तांचे कडल्यान पयशे उखळपाचो डाव दुबावितांनी रचलो. ते प्रमाण दुबावीत नितून धिल्लन हांकां सांगून 3 फेब्रुवारीक तें गोंयांत आयलें. ताका हाडपा खातीर मयतान गाडी धाडून दिली तेन्ना तिचे बरोबर जितेंद्रूय आशिल्लो.
व्हिलार आयले उपरांत तांणी गजाली करीत पार्टी केली. दुबावितांनी संद सादून धिल्लन हांचो व्हिडियो काडपाचो यत्न केलो. पूण त्याच वेळार मयताक कितेंय तरी गडबड आशिल्ल्याची सुलूस लागली आनी ते सतर्क जाले. आशिकुशीक लक्ष मारतकच व्हिडियोचें चित्रिकरण करपी दुबावीत जितेंद्राचेर तांची नदर पडली. रोखडोच तांणी बोवाळ मारपाक सुरवात केली.
तेबरोबर दोनूय दुबावितांनी निम्स हांकां धरून मारपेट केली. पूण ते दाद दिनात हें पळोवन तांच्या तोंडार उशें दवरून खून केलो. मयताक मरण आयिल्ल्याची खात्री करून हें खून प्रकरण चोरयेच्या हेतान घडलें आसुये, अशें भासोवपाचें तांणी थारयलें. मयताच्या गळ्यांतली भांगराची सरपळी, हातांतलें भांगराचें कडें आनी मोबायल फोन काडून घेतलो आनी व्हिलाच्या प्राकारांत उबी केल्ली फॉर्च्युनर मोटार घेवन दुबावितांनी पळ काडलो. पूण ते मोटारीक जीपीएस आशिल्ल्यान दुबावीत सांपडले. ह्या जीपीएसाच्या आदारान गोंय पुलिसांनी नवी मुंबय गुन्यांव फांट्याच्या पंगडाच्या आदारान वाशी टोल नाक्यार दुबावितांक धरले आनी ह्या खुनाचो तपास लागलो.
मजगतीं, हें खुनाचें प्रकरण फाटल्या 4 फेब्रुवारीक उक्तडार आयिल्लें. मयत धिल्लन हे आपले खाटीर मरण आयिल्ले अवस्थेंत पडिल्ल्याचें तांच्या कामगारांचे नदरेक आयिल्लें. उपरांत पर्वरी पुलिसांनी घडणूक थळार धांव घेवन तपासकाम केलें आनी त्याच दिसा सांजवेळा वाशी हांगा दुबावितांक मुंबय पुलिसांनी अटक केल्ली. पुलिसांनी दुबावितां कडल्यान फॉर्च्युनर मोटार तशेंच मयताच्या आंगा वेल्यो भांगराच्यो वस्ती आनी मोबायल फोन असो 47 लाखांचो म्हालवज जप्त केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
