भांगरभूंय | प्रतिनिधी
प्रकाश वेळीप: गोविंद गावडे वेले आरोप फटीचे
पणजी: सभापती रमेश तवडकार हांणी काणकोणां कोट्यांनी रुपया खर्च करून विवीध कार्यावळी केल्यो. सरकारी सुवातेंत भाडें दिनासतना खूबश्यो कार्यावळी आयोजीत करपाचे आरोप जाल्यात. तांच्या शिक्षण संस्थांक लेगीत कोट्यांनी रुपयांचो निधी मेळ्ळा. हें सगलें कायदेशीर आसा? हे विशीं सरकारान चवकशी करची अशी मागणी उटाचे अध्यक्ष प्रकाश वेळीप हांणी केली. काल (बिरेस्तारा) पणजेंत जाल्ले पत्रकार परिशदेंत ते उलयताले.
ह्या वेळार दुर्गादास गावडे, विस्वास गावडे, भालचंद्र उसगांवकार, अनील गांवकार सूर्यकांत आनी सतीश वेळीप हाजीर आशिल्ले.
फाटले कांय दीस कला आनी संस्कृती मंत्री गोविंद गावडे हांचेर गरजे भायर आरोप जायत आसात. कांय लोक मंत्री गावडे हांकांच लक्ष करतात. तांचेर जे आरोप केल्यात ते फटीचे आसात. काणकोणां कांय जाणांनी पत्रकार परिशद घेवन गावडे हांणी कार्यावळ करिनासतना संस्थांक पयशे दिल्ल्याचो फाटीचो आरोप केला. तशें पळोवंक गेल्यार ह्यो कार्यावळी जाल्यात. हातूंतले एके कार्यावळीक मुखेल सोयरो म्हूण हांवूच गेल्लों अशें वेळीप हांणी म्हणलें.
सभापतीन विधानसभा अधिवेशन सुरू आसतना हें सगलें समजून घेनासतना हो विशय माध्यमां मुखार मांडप चुकीचें आसा. हारशाच्या घरांत रावप्यांनी दुसऱ्याचेर फातर मारचे न्हय.
गांवडोंगरी आनी बार्शी हांगा जातल्या केंद्रीय प्रकल्पांक कोण आडखळ हाडटा? पर्वरे एसटी विद्यार्थ्यां खातीर बांदतल्या वस्ती घराचें काम कोणाक लागून अडून उरलां हाची लेगीत चवकशी करची अशी मागणी प्रकाश वेळीप हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
