भांगरभूंय | प्रतिनिधी
रमेश तवडकार: प्रकाश वेळीप हांचे सगले आरोप फटीचे
पणजी: प्रकाश वेळीप हांणी केल्ले सगले आरोपी फटीचे आसात. हांव तांकां म्हज्या शिक्षण संस्थांचें सगले हिशेब दाखोवपाक तयार आसां. तांणी म्हजे वयले आरोप सिद्ध करून दाखयल्यार हांव राजकारण सोडून घरा बसतां अशी प्रतिक्रिया सभापती रमेश तवडकार हांणी दिली. तांणी बिरेस्तारा पर्वरे पत्रकार परिशद घेवन वेळीप हांणी केल्ल्या आरोपांचें खंडण केलें. योग्य वेळार योग्य जाप दितलों अशी शिटकावणीय तांणी दिली.
तवडकार हांणी म्हणलें, वेळीप हांणी तांचो सगलो पंगड घेवन आमचे संस्थेंत येवचें. हांव तांकां सगलो हिशेब दाखयतां. तांणी बलराम शिक्षण संस्थेचेर आरोप केलो. ह्या संस्थेचें नांव संवसारभर पावलां. ह्या संस्थेच्या माध्यमांतल्यान गांवगिऱ्या वाठारांतल्या भुरग्यां खातीर केल्ल्या कामाक लागूनच म्हाका अमेरिकेंतले संस्थेन डॉक्टरेट पदवी दिली. अशें आसून लेगीत ते ह्या संस्थेचेर आरोप करतात आसत जाल्यार म्हाका तांची काकुळट दिसता.
आनीक एक संस्था सरकारी सुवात फुकट वापरत आशिल्ल्याचो आरोप तांणी केलो. तो लेगीत फटीचो आसा. आमी सरकारा कडेन ह्या सुवातेचें भाडें माफ करचें असो अर्ज केला. ताचेर अजून सरकारान कसलोच निर्णय घेतिल्लो ना. जर सरकारान आमची मागणी मान्य केली ना जाल्यार नक्कीच आमी भाडें फारीक करतले. तशेंच शाळा बांदपा खातीर 43 कोटी रुपयांचो घोटाळो आशिल्ल्याचो आरोप लेगीत तांणी केला. ही संस्था जीएसआयटीसी बांदता. ताचो खर्च 23 कोटी रुपया आसा. हातूंत भ्रश्टाचाराचो प्रस्नूच येना अशें तवडकार हांणी म्हणलें.
आयज मेरेन एसटी समाजाच्यो जितल्यो चळवळी जाल्यो ताचो केंद्रबिंदू काणकोण आनी हांव आसा. हांव स्वता कश्ट करून व्हड जालां. हांवें केन्ना कोणाचो दुस्वास केल्लो ना. हांव मंत्री आसतना वेळीप हांणी सेगीत म्हजे आड पत्रकार परिशदो घेतल्यात. पूण हांवें केन्नाच तांकां जाप दिली ना. मंत्री आसतना हांव ह्या समाजांतल्या लोकां खातीर 25 येवजण्यो हाडल्यो. ताचो समाजाक मोटो फायदो जालो अशें तवडकार हांणी सांगलें.
अशें आसून लेगीत कांय लोक म्हजे प्रतिमेचेर दाग लावपाचो यत्न करतात. ‘साठी बुद्धी नाठी आनी सत्तरी बालबुद्धी’ अशे म्हणटात. वेळीप हांचे बरोबर आशिल्ल्या तरणाट्यांनी हाचो विचार करचो. म्हज्या मतदारसंघांत 17 संस्थांक पयशे दिले. पूण ह्यो कार्यावळी खंय आनी केन्ना जाल्यो हाचो तांणी सोद घेतलो. ह्या मुद्याचेर तांणी म्हाका तशेंच मुख्यमंत्री डॉ. प्रमोद सावंत हांकां निवेदन दिलां. हो विशय विधानसभा, मुख्यमंत्री, हांव आनी मंत्री गावडे हांचे पुरतो मर्यादीत आसा अशें आसून लेगीत उटा संघटणेक त्रास जावपाचें कारण ना अशेंय तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
