भांगरभूंय | प्रतिनिधी
ऑस्ट्रेलियेचो पंगड सवे खेपे 19 वर्सां पिराये सकयले संवसारीक क्रिकेट सर्तीचे फायनलींत पावलो. काल जाल्ले उमळशीक वाडोवपी दुसरे सेमी फायनलींत ताणें पाकिस्तानाक एके विकेटीन हारयलो.
आतां 11 फेब्रुवारीक जावपी फायनलींत ऑस्ट्रेलिया पंगड भारता आड खेळटलो. फायनल बेनोनीच्या विलोपूर पार्कांत जातली.
मजगतीं, 180 धांवड्यांचो फाटलाव करपी ऑस्ट्रेलियेक जैता खातीर 17 धांवड्यांची गरज आशिल्ली आनी ताच्यो णव विकेटी पडिल्ल्यो. हांगाच्यान रफ मॅकमिलन आनी कॅलम विडलर हे निमाणे जोडयेन 17 धांवड्यांची म्हत्वाची भागिदारी करून जैत मेळोवन दिलें.
ते पयलीं टॉस हारल्या उपरांत पयलीं बॅटींग करपी पाकिस्तानानाचो डाव 48.5 ओव्हरींनी 179 धांवड्यांचेर सोंपलो. ऑस्ट्रेलिये वतीन टॉम स्ट्रॅकरान 6 विकेटी घेतल्यो.
179 धांवड्यांचो फाटलाव करपी ऑस्ट्रेलियेन सादूर सुरवात केली. 33 धांवड्यांचेर ओपनर सॅम फोंस्टस (14) बाद जालो. एके वटेच्यान विकेट पडत आशिल्ल्यो. पूण, दुसरे वटेच्यान हॅरी डिक्सनान (50) डाव सांबाळून धरिल्लो. मुखेली ह्युज विबजेन (4) बाद जालो त्या वेळार पंगडाच्यो 43 धांवड्यो जाल्ल्यो.
ते उपरांत हरदस सिंग पांच आनी विकेटकीपर बॅट्समन रेयान हिक्स शुन्याचेर बाद जालो.
ते उपरांत ओलिव्हर पिकेन 49 धांवड्यो करून ऑस्ट्रेलियेचो डाव मुखार व्हेलो. अखेरच्या 12 ओव्हरींनी पाकिस्तानाच्या अराफत हाणें कॅम्पबेल (25) हाका आनी अली रजान ओलिव्हराक बाद करून मॅचींत उमळशीक हाडली. 46वे ओव्हरींत अली रजान पाकिस्तानाक मॅचींत हाडलो. ताणें एकेच ओव्हरींत 2 विकेटी घेतल्यो. हांगाच्यान मॅकमिलन आनी विडलर हाणें नाबाद भागिदारी करून ऑस्ट्रेलियेक जैत मेलोवन दिलें.
ते पयलीं पाकिस्तानाक व्हड धांवसंख्या उबारपाक अपेस आयलें. अवैसान 91 बॉलांनी तीन चवक्यांचे मजतीन 52 धांवड्यो केल्यो. मिन्हासान 61 बॉलांनी 52 धांवड्यांची खेळी केली. शमील हुसैनान 17 धांवड्यो केल्यो. ह्या तीन बॅट्समनांक सोडले जाल्यार पाकिस्तानाच्या एकाय बॅट्समनाक दोट्टी आंकडो हुपपाक जमलो ना. ऑस्ट्रेलिये वतीन टॉम स्ट्रॅकरान सगल्यांत चड स विकेटी घेतल्यो.
11 फेब्रुवारीक फायनल जातली. भारत आनी ऑस्ट्रेलिया ह्या पंगडांनी एकामेका आड केल्ल्या प्रदर्शनाचेर नदर मारली, जाल्यार 19 वर्सां पिराये सकयले संवसारीक सर्तींत ऑस्ट्रेलिये आड हारिल्ल्याक भारत 34 वर्सां जालीं. ऑस्ट्रेलियेन भारता आड निमाणे खेपे जैत 1990त सेंच्युरियनाच्या मैदानांत मेळिल्लें. ते मॅचींत ऑस्ट्रेलियेन 6 विकेटींनी जैत जोडिल्लें. ते उपरांतच्यान भारतान हे सर्तींत ऑस्ट्रेलिये आड जैत जोडलां. फाटले संवसारीक सर्तींत भारतान ऑस्ट्रेलियेक 96 धांवड्यांनी हारयिल्लो.
मजगतीं, ऑस्ट्रेलियेच्या पंगडांत दोन मूळ भारतीय खेळगडे आसात. दोगूय पंजाबाचे. हरजस सिंग आनी हरकिरत सिंग बाजवा अशीं तांची नांवां आसात. तांचे कुटूंब ऑस्ट्रेलियेंत वेवसाय करता.
मंगळारा जाल्ले पयले सेमी फायनलींत भारतान येजमान दक्षीण आफ्रिका पंगडाक 2 विकेटींनी हारयिल्लो. भारत विक्रमी णववे खेपे फायनलींत पावला.
आफ्रिकेन दिल्ले 245 धांवड्यांचे मोखीचो फाटलाव करतना भारतान एका वेळार 32 धांवड्यांचेर 4 विकेटी वगडायिल्ल्यो. अशा वेळार सचिन धास (96) आनी मुखेली उदय सहारन (81) हाणें पांचवे विकेटी खातीर 171 धांवड्यांची भागिदारी करून भारताक जैताच्या मार्गार हाडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
