भांगरभूंय | प्रतिनिधी
भांगरभूंय । प्रतिनिधी
म्हापशेंः हळदोणे पंचायत वाठारांतल्या रामतळे हांगची कांय घरां बेकायदेशीर थारावन पंचायत मंडळान नोटीशी धाडून तांची पळोवणी केल्ली. ताका जाप म्हणून रामतळेंकारांनी आमदार अॅड कार्लुस फेरेरा आल्वारीस तशंच कांय पंच वांगड्यांची बांदकामां आड पंचायत कार्यालयांत कागाळ केल्या. ह्या लोक प्रतिनिधींनी पंचायत प्रशासन वा सरकारी प्राधिकरणां कडल्यान जाय ते परवाने घेनासतना घरांचें बांदकाम केल्यांत असो दावो तांणी केला. रामतळे हांगा एमआरएफ शेडीच्या बांदकामा वयल्यान रामतळेकार आनी लोक प्रतिनिधी एकमेकां सामकार आयल्यात.
एमआरएफ शेटीच्या बांदकामा वयल्यान ग्रामस्थ आनी पंचायत मंडळा मदीं तेढ तयार जाल्या आनी आरोप- प्रत्यारोप सयत सूडाचे राजकारण गांवांत सुरू जालां. बिरेस्तारा रामतळेकारांनी आमदार आनी तीन पंच वांगड्यांच्या घर बांदकामा आड पंचायत कार्यालयांत कागाळ नोंद केल्या. रामतळे देवस्थाना लागीं एफआरएफ शेडीच्या बांदकामाक आमी विरोध केल्ल्या पसून हणदोणे पंचायत मंडळ आमका जाणा जावंन लक्ष्य करता. शेडीक आमचो विरोध ना मात ती जे सुवातेर बांदपाचें थारायलां ते सुवातेक आमचो विरोध आसा. फाटल्या जायत्या वर्सा सावन आमची घरां कोमुनिदाद जमनीत आसात पूण कोणेच केन्ना तााका हरकत घेतली ना. शेड बांदकामाचो प्रश्न तयार जाल्या सावन सूडाचें राजकारण सुरू जातां अशें रामतळेकारांनी सांगलें.
सगले परवाने घेतल्यात
रामतळेकारांनी म्हज्या आड कागाळ करून घराचें बांदकाम बेकायदेशीर आशिल्ल्याचो आरोप केला. पूण हावें प्राधिकरणा कडल्यान जाय ते सगले परवाने घेतल्यात. 10 वर्सा आदी हावें घराचें आनी राखणे वण्टीचें बांदकाम केल्लें. पंचायती कडल्यान म्हाका नोटीस आयल्यार हांव सगली कागदपत्रां सादर करतलो. सध्या रामतळेकारांची एक व्यक्ती दिकाभूल करून तांकांआपल्या आड उबें करपाचे यत्न चल्ल्यात. म्हजे आड कागाळ केली तरी हांव ताचेर सूड घेवपा सारके कांय करचो ना अशे आमदार अॅड कार्लुस फेरेरा हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
