भांगरभूंय | प्रतिनिधी
भांगरभूंय । खबरां मेज
पणजीः देशांतल्या लोकांक न्याय मेळोवन दिवपा खातीर राहुल गांधी हांणे सुरू केल्ल्या भारत जोडो न्याय यात्रे खातीर प्रदेश काँग्रेस समितीन बिरेस्तारा देणगी मोहीमेची घोशणा केली. 17 तें 20 मार्च मजगती ही यात्रा जातली. ह्या वेळार काँग्रेस म्हासमितीचो राष्ट्रीय म्हणयारो विजय इंदर सिंग, महाराष्ट्र प्रदेश काँग्रेस समितीचो सरचिटणीस आनी मुखेल म्हणयारो अतुल लोंढ पाटील, गोंयचो प्रभारी माणिकराव ठाकरे, प्रदेश काँग्रेस अध्यक्ष अमित पाटकार, युवा काँग्रेसची गोंय प्रभारी रिची भार्गव आनी विरियटो फर्नांडीस हाजीर आशिल्ले.
देणगीदार कितलीय रक्कम दिवपाक शकतात. ही देणगी कर मुक्त आसतली आमी ह्या देणगी मोहिमेक न्याय यात्रे कडेन जोडलां, राहुल गांधी 6700 किलोमीटर अंतर चलतले, ताका लागून लोकांनी दर किलोमीटराक एक पयसो वा ताचे परस चड पयशे दिवपाक शकतात, अशें विजय इंदर सिंग हांणी एके पत्रकार परिशदेंत सांगलें. राहुल गांधी लोकांक मेळटात आनी तांच्यो समस्या समजून घेतात. सध्या म्हारगाय वाडट आसा. मुखेल म्हणल्यार तरणाट्यांक नोकऱ्यो दिवपाक भाजप सरकार सामकें अपेशी थारलां असें ताणे सांगलें.
देणगीचे पयशे रोख घेवचे नात. ते ऑनलायन पेमेंट वरवी धाडटले तांकां रोखडेच प्रमाणपत्र, पावती आनी राहुल गांधी हांच्या सयेचें पत्र मेळटले. ही देगणी मोहीम दरेका बुथा मेरेन पावपाक जाय. ताका लागून लोक गांधी हांच्या संकल्पने कडेन जोडटले असें तांणे सांगलें. राहुल गाधी हांची यात्रा देशांतल्या लोकांक सामाजीक आनी राजकी न्याय दिवपा खातीर आसा. लोकांक न्याय मेळना देखून राहुल गांधी लोकांच्या भल्या खातीर वावुतात अशें माणिकराव ठाकरे हाणे सांगलें.
मोदींची गॅरंटी म्हणल्यार जुमला
मजगतीं, पंतप्रधान नरेंद्र मोदी हांणी दोन कोटी रोजगार निर्मणेचें आस्वासनाक पाळो दिनास्तनाा तरणाट्यंची फटवणूक केल्या. तांची गॅरंटी म्हणल्यार जुमला अशें अतुल लोंढे पाटील हाणे हे पत्रकार परिशदेंत सांगलें. मोदी हांणी अग्निवीरांक भलायकी वा पेन्शनाच्या सुविधा दिल्यो नात,तांचो विस्वासघात केला असो आरोप तांणी केला. खर निवड प्रक्रिया पास केल्ल्या उपरांत 1.5 लाख तरणाट्यांची अग्निवीर येवजणे खाला निवड केली मात तांका कामार घेतलें ना. तांकां सेवेंत घेवन सशस्त्र दलां खातीर पयलीची भरती प्रणाली परत सुरू करची अशी आमची मागणी आसा, अशें ताणे सांगलें.
काँग्रेसाचें संपर्क अभियमान सध्या सुरू आसा. ताच्या माध्यमांतल्यान 30 लाख परस चड घराब्ंयाक काँग्रेस वावुरपी भेट दितले. 5 तें 10 मार्च मजगतीं चडांत चड तरणाटे आनी तांच्या घराब्यां मेरेन वचून म्हायती एकठांय करतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
