भांगरभूंय | प्रतिनिधी
पणजी : पर्यटन खात्यान मिरामार दर्यादेगेर ९ ते ११ फेब्रुवारी ह्या काळांत सी फूड फेस्टिव्हल आयोजीत केल्लो. मात, मुंबय उच्च न्यायालयाच्या गोंय खंडपीठांत जनहीत याचिका दाखल जाल्या. हे याचिकेचेर आयज जाल्ले सुनावणे वेळार हो महोत्सव फुडें धुकलपाक सरकार तयार आशिल्ल्याचें स्पश्ट केलें. ताका लागून वयल्या काळांतलो सी फूड फेस्टिव्हल रद्द केला. आतां हे याचिकेचेर फुडली सुनावणी जातली.
पर्यटन खात्या वतीन मिरामार दर्यादेगेर ९ ते ११ फेब्रुवारी मजगतीं सी फूड फेस्टिव्हल आयोजीत केल्लो. मात ह्या महोत्सवा आड पॅट्रेसिया पिंटो, रितू प्रसाद, देविका शेट्टी, मनिषा ब्रागांझा हांचे सयत हेर सात जाणांनी खंडपीठांत जनहीत याचिका दाखल केली.हातूंत तांणी राज्य सरकार, पर्यटक खातें, पणजी महानगरपालिका आनी गोंय दर्यादेग वाठार वेवस्थापन प्राधिकरणाक (जीसीझेडएमए) प्रतिवादी केल्या. हे याचिकेचेर आयज सुनावणी जाली. हे विशीं सरकाराने आपले प्रतिज्ञापत्र सादर केलें. दोनूय वटेन युक्तीवाद जाले उपरांत सरकारान हो महोत्सव फुडें धुकलपाची तयारी केल्या. ताका लागून हो महोत्सव सध्या रद्द केला. आतां ह्या प्रकरणांत २६ मार्चाक फुडली सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
