भांगरभूंय | प्रतिनिधी
कॅनबेरा, खबरां संस्था ः ह्या सप्तकांत ऑस्ट्रेलियन संसदेंत कामगारांच्या हिताची राखण करपाचें नवें विधेयक मांडटले. हाचे खाला कर्मचाऱ्याक ड्युटी सोंपतकच बॉसाच्या कॉलाक जाप दिवपाची लेगीत गरज पडची ना. हाचे भायर कर्मचाऱ्याक ड्युटी उपरांत कसलेंच कार्यालयीन काम करपाक मेळचें ना.
विधेयकाच्या मसुद्या प्रमाण ड्युटी सोंपतकच खंयच्याय अधिकाऱ्यान आपल्या कर्मचाऱ्याक काम करपाक जबरदस्ती केली वा दबाव हाडल्यार ताका व्हडली भरपाय दिवची पडटली. हें विधेयक संमत जावन कायदो जातलो हें निश्चीत. कारण सरकारा बरोबरच विरोधी पक्षूय ह्या विधेयकाक पुराय तेंको दितात.
ऑस्ट्रेलियांतले समाजसेवक आनी कर्मचारी संघटना कितलेशेच दीसा सावन देशांतली कार्यसंस्कृताय सुदारची अशी मागणी करतात. हाचे भायर देशांतली संस्कृताय सुदारून वर्क-लाइफ समतोल सादचो अशी सतत मागणी करतात. हे खातीर रोजगार मंत्री टोनी बर्क हांणी हें विधेयक तयार केलां आनी ह्या सप्तकांत तें संसदेंत मांडटले.
ह्या विधेयका प्रमाण आतां बॉसान कसलेंच वैध कारण नासतना ड्युटी उपरांत खंयच्याच कर्मचाऱ्याक फोन करप ना. ताका खंयच्याय ईमेलाक जाप दिवपाक वा खंयच्याय दस्तावेज फायलीक अपडेट करपाक सांगचे न्हय. जर कर्मचाऱ्यान बॉसाचेर कागाळ केल्यार तपास जाले उपरांत त्या बॉसाचेर कारवाय जातली. ताचे कडल्यान व्हड भरपाय वसूल करतलें.
हो कायदो फ्रांस बरोबर हेर 20 देशांनी कितल्याशाच वर्सां सावन लागू जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
