भांगरभूंय | प्रतिनिधी
केंद्रीय गृह राज्यमंत्री नित्यानंद राय हांची लोकसभेंत म्हायती
नवी दिल्ली, खबरां संस्था ः फाटल्या कांय वर्सांत बायलांनी वेगवेगळ्या मळार क्रांती घडोवन हाडल्या. दादल्यांच्या प्रधानतेच्या मळार लेगीत बायलांनी आपली खाशेली सुवात मेळयल्या. लश्करी सेवेंतय बायलांनी सुवात मेळयलां. तशेंच केंद्रीय सशस्त्र पुलीस दळांत 41 हजार 606 बायलो कर्मचारी काम करतात अशी म्हायती केंद्रीय गृह राज्यमंत्री नित्यानंद राय हांणी लोकसभेंत लेखी जापांत दिल्या.
केंद्रीय सशस्त्र पुलीस दळ (Central Arm Police Force), केंद्रीय राखीव पुलीस दळ, केंद्रीय उद्देगीक सुरक्षा दळ, इंडो-तिबेट शिम पुलीस, सशस्त्र शिम दळ, शिम सुरक्षा दळ आनी आसाम रायफल्सांत बायलां कर्मचाऱ्यांची भरती करपाक प्रोत्साहन दिवपा खातीर मंत्रालय पावलां उबारतात. केंद्रीय गृह राज्यमंत्री नित्यानंद राय हांणी हे संबंदी सभाघरांत लेखी जापेत म्हायती दिली.
बायलां कर्मचाऱ्यांक मेळटल्यो ह्यो सुविधा…
केंद्र सरकारा खाला प्रसूती रजा आनी भुरग्यांच्या संगोपनाची सुटी सीएपीएफच्या बायलां कर्मचाऱ्यांकय लागू जाता. मंत्रीमंडळाच्या म्हणण्या प्रमाण बायल कर्मचाऱ्यांची भरती करपा खातीर मंडळांत वांगडी म्हणून बायलेची नेमणूक केल्या. “सीएपीएफान बायलां कर्मचाऱ्यांक दिल्ल्या हेर सुविधां मदीं क्रेच आनी डेकेअर सेंटर आसा. लैंगीक त्रास आडावपा खातीर आनी बायल कर्मचाऱ्यांच्यो तक्रारी बेगोबेग सुटावे करपा खातीर सगळ्या पांवड्यार समित्यो स्थापन केल्या अशें तांणी बरयल्ल्या जापांतल्यान सांगलां. बायल कर्मचाऱ्यांक तांच्या करिअर उदरगतींत, बडटी आनी वरिश्ठतायेंत नेमा प्रमाण समान संद मेळटली अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
