भांगरभूंय | प्रतिनिधी
जेनिफान डॅविडाच्या ओंठांचे चरचरींत उम्यांर – उमे घेतले. तांचे मदलो तो चान्न्यांतलो मोग पळोवन चंद्र लेगीत कांय खीण आपलें चान्नें लिपोवन लजेन कुपांच्यो आड रिगिल्लो. काळखाच्या आडोसाक जेनिफा सामकेंच व्हांवोन गेलें.
….परतून एक फावट जेनिफा पुटपुटली. 1967 वर्सांतली गजाल… इस्रायल देशांतले कांय दांडगे तरणाटे गोंयचे भोंवडेर गोंय पळोवपाक आशिल्ले. तांचे मदीं डॅवीड कोहान, एरियल रेहुबेन, दानियल योसेप, अब्राहम फेल्डमॅन हे चार इश्ट कोलव्या रावपाक आयिल्ले. ते जेनिफाल्या माशेना हॉटेलार रावताले. अदीं-मदीं केन्नाय जेनिफा माशेनाच्या हॉटलाचेर तिका कामाक मजत करपाक वताली. नकळटना जेनिफाची डॅवीडा कडेन इश्टागत जाली.
‘चड करून इस्रायली लोक हे प्रत्यक्ष उर्बेभरीत आसतात. तांका केन्ना-केन्नाय मोठ्यान उलोवपाक आवडटा. माशेनान गल्ल्या कडेन आयिल्ल्या जेनिफाक म्हणलें.
‘व्होय माशेन…! पळेलां हांवें. तांचे कुडीचेर नदर मारल्यार…आवोयस.. तांचे मस्सल चोय….अडेची माहिती जेनिफान माशेनाक सांगली.
‘बाय, तूं मात्शी तांचे पासून पयसूच राव. तूं डॅवीडा कडेन उलयतना हांवें तुका पळेयिल्ले. ह्या लोकां मदीं घुस्पनाका. ते तरणाटे आसात. म्हज्या मतान तरणाटे म्हणल्यार कासादोर कशे ! सट्ट करून आपली शिकार करून कूस मारतले. धाडसी सभावाचे लोक हे. कीस मारप, वेंग मारप, हात लावप, तांकां कांय दिसना तें. पूण फरक आमकां पडट्टा न्हय?
“ पळे, पळे, तो आनीक तें गोंयकार चेंडवाच्या हातांत हात घालून वता. तो आनीक कसले नमस्कार करता… अशें करून तें आमच्या चेंडवांक भुलयतात. देखून आमी कासादोरांक कास करूंक दिवंक फावोना बाय…’ माशेन जेनिफाक आपले परीं समजणी दितालें
डॅवीड, जेनिफा कडेन उलोवपाची संद पळयतालो. माशेन भितर कामांत गुंथलेलें आसताना जेनिफाक कांय वेंचीक गजालीं सांगतालो. ताचे शैलीन जेनिफाक पिशें लायिल्लें..! अशींच एक खबर सांगतना ज्युस्त माशेन फुड्यांत पावलें. डॅविडान पर्वा केली ना आनी सांगत रावलो…
“आमी इस्त्रायली मोसाद आर्मीं दळांत वावर करतात. मोसाद म्हणल्यार हिब्रूंची संस्था. ही मानवी गुप्तहेर एकठांय जावन आंतकवादी फुडो करपाची जापसालारकी सांबाळटा. संवसारभरच्या अरब देसांचेर आनी आंतकी संघटणांचेर आमी नदर दवरून आसतात. सिरिया, इराण, इथिआपोया ह्या देशांतल्या ज्यू निर्वासितांच्या हालचालींचेर नदर दवरपाची जापसालदारकी मोसादाचेर आसा. 13 दिसेंबराक 1949 वर्सा स्थापना जाल्ल्या, मोसादाक दुसरो हॉलोकोस्टा आड जिवीत विमो अशें मानतात…’’
भावनेच्या भरांत उलयल्लीं डॅविडाची उतरां जेनिफाराक भोव आवडिल्लीं. पूण माशेनाची भियेवन गुळो जालो. डॅवीडाची थंयची परिस्थिती तांकां समजून सांगली. हें आयकून जेनिफाक डॅवीडाचो अभिमान दिसलो. माशेन लेगीत भुल्लुसून गेलें. आनी ताणें मनांतल्या मनांत म्हणलें,- डॅवीड आमचो रेंवटांतलो जांवय जावंक जाय !..
तोवूय त्या काळा वेलो फामाचो दीस आसलो…
“आन्टी, हें कोलवेंचें फेस्त कित्या पासत मनयतात डॅवीडान विशय बदलपाक प्रस्न केलो. जोगलावणी भशेन माशेनाचें मन बद्दलें. आनी ताचे आवयन सांगिल्ल्या इतिहासाची तिका याद जाली.
ही 17 व्या शेंकड्यांतली घडणी…
माशेनान सांगपाक सुरवात केली…
“ एक जेझुईत पाद्री बेनीटो फेरेरा, जाची नेमणूक गोंय- कोलवेचे मर्सीचे इगर्जेंत जाल्ली. तो तारवान येतना, अचकींत ताचें तारूं बिगडलें. आनी हेर तारवट्यां बाराबर फादराकय मोझांबीकाचे दर्या देगेर वच्चें पडलें. थंयच ताका मिनीन जेजुची एक मूर्त मेळ्ळी. गोंया येतना पाद्री बेनीटोन ती मूर्त आपल्या बराबर हाडिली. 1668 वर्सा तो कोलवेचे इगर्जेंत पावलो. तेन्ना लोकां सांगातान व्हडा भक्तेन, ताणें इगर्जेत एका खास वेदीचे मुर्तीची स्थापना केली. तेन्ना सावन कोलवे गांवांत फामा उत्सव स्थापन जालो. आनी त्या मुर्तीची भौसा वतीन भुजवण सुरू जाली. ते वटेन पुर्तूगेजांक सत्तेच्या संघर्शाक लागून धर्मीक लडाय जाल्ली. पाद्रींक पळापळ करची पडली. देखून पाद्री बेनीटो हांका राशोल सेमिनारींत आसरो घेवंचो पडलो. वतना ताणें ही मूर्त आपले वांगडा व्हेली. गांवंच्या लोकांनी राशोल सेमिनारींत वचून मुर्तेची मागणी केली. पूण पाद्रीन मूर्त दिवंक न्हयकार दिलो. निरास जाल्ल्या गांवकारांनी परतून घरचीं वाट धरली. परतीच्या प्रवासांत तांणी तसलींच नवीं मूर्त करपाची निर्णय घेतलो. इगर्जे कडेन तांकां आदले मुर्तीच्या आंगार आसलेली भांगराची मुदी मेळ्ळीं. नवीं मूर्त केल्या उपरांत ही मुदी गांवकारांनी नवे मुर्तीचेर चडयली. आनी देवासांव परतून सुरूं जालें. सवका- सवका करून परतून भुजवणें खातीर लोक येवंक लागले. कोलवें, सेर्नाभाटी, वेळ्ळीं आनी गौडालीम ह्या गांवच्या लोकांनी त्या वेळार खर कश्ट घेतले. नवे मुर्तेची चमत्कारीक शक्ती अणभवूंक लागले…
अचकींत मागीदारांतल्या कांय दुकरांच्या आवाजान, माशेनाच्या गजालींतल्यान जेनिफा भानार आयली.
आगो, फिलू? सुर्या माथ्यार पावलो मुगो. दोनपार जाली. त्या घुडांतल्या दुकरांक आजुनूय तुवें धोण आनी खावड घालूंक ना? कितें गो बाये तूं? तांकां म्हण भूक लागोना? आपली नाखोशी उक्तावन फिलूचेर इल्लो राग काडिल्लो.
घालता गो बाये, तूं बेश्टें टेन्शन घेनाका… पिलून त्या घुडा रावोन सांगलें.
“तो डॅवीड आयलेलो तुजी वखदां दवरून गेलो. फिलून डॅवीडाचें नांव काडट्टनाच जेनिफाक कसलो तरी उगडास आयलो. ताणें हारश्यांत नदर मारली. आपले कुशींत डॅवीड आसा, असो ताका भास जालो. ताच्या कानार आरबी समुद्राच्या ल्हारांचो घसघस ताका आयकूंक येवंक लागलो. फामाचें फेरये पलतडीचो तो 1967 वर्सांतलो एके आमोरेचो वेळ आसलो.
…ती कोलवेंची दर्या वेळ मात्शी उंचाबळ…
दर्यार ल्हारांचो गाज चालूच आशिल्लो. डॅवीड आनी जेनिफा हातांत हात घालून रेंवेंत तेंकोवन बसून आशिल्लीं. डॅवीडाक कोंकणी भाशेची मात्शी अडचण जाताली, तसो तो इंग्लीशी शिवाय अरबी आनी हिब्रू ह्यो भासो बेस ब-यो उलयतालो. इतले दीस कोलवें गांवांत रावलें उपरांत जेनिफा आनी ताच्या माशेना कडल्यान थोडीं – थोडीं कोंकणी शिकिल्लो. आपली 16 वर्साची पिराय हुंपिल्ल्या जेनिफान आपलें मौन तोडलें. आनी सवकास स्वरान म्हणलें,
“ डॅवीड पळे, तीं ल्हारां जशे पोरीं रेंवेक तडीर सांडटाय. आनी परत त्या अथांग दर्यांत परतून वेताय. तशे तूं म्हाका कोच्चो ना मुरे ? हुस्को काडीत भिरांतेन जेनिफान आपलें मन उगतें केलें.
“ ना गो म्हज्या मोगा ’अशें म्हणींत डॅवीडान अचकींत जेनिफाक कडकडीत घट्ट वेंगेंत घेतलें. जेनिफा हेच संदीक रावतालें आसत. डॅवीडाच्या ओंठांचे चरचरींत उम्यांर – उमे घेतले. तांचे मदलो तो चान्न्यांतलो मोग पळोवन चंद्र लेगीत कांय खीण आपलें चान्नें लिपोवन लजेन कुपांच्यो आड रिगिलो. काळखाच्या आडोसाक जेनिफा सामकेंच व्हांवून गेलें. कांय खीण थंड शितळ रेंव लेगीत तांच्या उबेन गरमेली. निकतेंच शींय इल्लें-इल्लें पडपाक लागिल्लें. त्या शिंयांचेर लेगीत जेनिफान मात केल्ली…
(मुखार चलता..)
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
