भांगरभूंय | प्रतिनिधी
भारताचो नामनेचो बॅट्समन विराट कोहली इंग्लंडा आड जावपी तिसरे आनी चवथे टॅस्टींत लेगीत खेळचो ना. तिसरी राजकोट आनी चवथी मॅच रांची शारांत जातली. तशेंच 6 मार्च सावन धर्मशालांत सुरू जावपी पांचवे टॅस्टी खातीर लेगीत तो खेळचो ना अशी चर्चा आसा.
कोहलीची गैरहाजेरी मतींत दवरून निवड समिती सप्तकाचे अखेरेक बाकी आशिल्ल्या मॅचीं खातीर आपलो पंगड जाहीर करतलो.
इंग्लंडा आडची टॅस्ट माळ सुरू जावपाक कांय दीस बाकी आसतना कोहलीन पयल्या दोन टॅस्टींतल्यान स्वताक पयस दवरपाचो निर्णय घेतला अशें भारतीय क्रिकेट नियामक मंडळान जाहीर केल्लें. भारताची पयली मॅच हैदराबादांत जाल्ली. थंय पंगडांत सामील जावपाक कोहली हैदराबादांत पाविल्लो. पूण, तो थंयच्यान रोखडोच घरा गेलो. ते उपरांत कोहलीचे गैरहाजेरी विशीं बीसीसीआयन कसलेच अपडेट्स दिवंक ना.
माळेंतल्यान भायर रावपा विशीं कोहलीन मुखेली रोहित शर्मा, पंगड वेवस्थापन आनी निवड समिती कडेन चर्चा केल्ली अशें बीसीसीआयन त्या वेळार म्हणिल्लें.
वैयक्तीक कारणाक लागून कोहलीन पंगडांतल्यान भायर रावपाचो निर्णय घेतला. मजगतीं, दुसरे टॅस्टींत खेळूंक नाशिल्लो फास्ट बॉलर मोहम्मद सिराज तिसरे मॅची वरवीं पुनरागमन करपाक शकता. लोकेश राहुल आनी रवींद्र जडेजा हे लेगीत दुखापतीक लागून दुसरे टॅस्टींत खेळूंक नाशिल्ले. पूण, तिसरे टॅस्टी खातीर तांचो पंगडांत आस्पाव जावपाक शकता. तिसरी टॅस्ट सुरू जावपाक अजून एक सप्तक आसा.
पांच टॅस्टींचे माळेंत सध्या दोनूय पंगड 1-1 अशे बरोबरींत आसात. पयली टॅस्ट इंग्लंडान जिखिल्ली, जाल्यार दुसरे मॅचींत भारतान व्हड जैत जोडून बरोबरी सादिल्ली. पयले मॅचींत जडेजा आनी राहुल दोगांयनी बरी बॅटींग केल्ली. पूण, तांकां शेंकडे चुकिल्ले. राहुल चवथे सुवातेर बॅटींग केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
