भांगरभूंय | प्रतिनिधी
भांगरभूंय । प्रतिनिधी
काणकोणः काणकोणाक उजो पालोवपी दलाचे फायर स्टेशन बांदपा खातीर गोवा हावसिंग बोर्डांत श्रीस्थळ वाठारांतली 2,275 चौखण मीटर दिल्या. 2019 वर्सा विधानसभा वेंचणुके उपरांत आदलो मुख्यमंत्री सर्गेस्त मनोहर पर्रीकार हाणे काणकोणांत फायर स्टेशन बांदपाचें आस्वासन दिल्लें.
हावसिंग बोर्डाची वेवस्थापकीय संचालिका नीता पी आमोणकारान उजो पालोवपी दलाच्या संचालकाक धाडल्ल्या पत्रांत जमीन दिवपाच्या हावसिंग बोर्डाच्या निर्णयाची म्हायती दिवंन दरेका चौखण मीटराक 4700 रुपये दिवचे पडटले अशें नमूद केलां.
सध्या काणकोणचें फायर स्टेशन काणकोण पुलीस स्टेशनाच्या सामकार एका गुदावांत सुरू आसा. थंय एक फायर टेन्डर आनी एक सब ऑफिसर आसा. सुवात जाय तितली नाशिल्ल्यान थंय दलाच्या जवानांक कशें बशें काम करचें पडटा, 2019 वर्सा मुख्यमंत्री पर्रीकार श्रीस्थळा उदका पायपलायनीचें उक्तावण करपाक आयिल्ले कडेन ताणे ते्न्नाचो काँग्रेस पक्ष आमदार इजिदोर फर्नांडीस हाणे फायर स्टेशन बांदपाची मागणी केल्ली. गोंय हावसिंग बोर्डाच्या श्रीस्थळ हागचे सुवातेंत जमीन मेळ्ळ्यार स्टेशन बांदपाचें उतर पर्रीकार हाणे दिल्लें.
तेन्नाचो हावसिंग बोर्ड मंत्री जयेश साळगांवकार आनी इजिदोरान जमनीची पळोवणी केल्ली. सगल्या सोपस्कारा उपरांत गोंय हावसिंग बोर्डाच्या 517वे बसकेंत काणकोणा फायर स्टेशन बांदपा खातीर जमीन दिवपाचो निर्णय घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
