भांगरभूंय | प्रतिनिधी
भांगरभूंय । प्रतिनिधी
पोरणे गोंयः भोमा हांगच्या राष्ट्रीय म्हामार्ग रुंदिकरणा विशीं पंतप्रधान कार्यालयान (पीएमओ) तशेंच राष्ट्रपतीच्या सचिवालयान तपशीलवार म्हायती दिवपाक सांगलां. रस्त्याक विरोध करपी भोमकारां वतीन सुनील भोमकार हाणे पंतप्रधान कार्यालय तशेंच राष्ट्रपती सचिवालयाक पत्र धाडून न्याय मेळोवन दिवपाची मागणी केल्ली. त्या पत्रांक प्रतिसाद दिवन तांणी संबंदीत अधिकाऱ्यांक पुराय म्हायती दिवपाक सांगलां.
राष्ट्रपतीच्या सचिवालयान राष्ट्रीय म्हामार्ग प्राधिकरणाच्या मुंबयच्या विभागीय कार्यालया कडल्यान तशेंच गोंयांतल्या प्रकल्प अंमलबजावणी युनिटाक कडल्यान भोमांतल्या रस्तो रुंदिकरणाची म्हायती मागल्या. पंतप्रधान कार्यालयान उत्तर गोंय जमीन संपादन उप सचीव आनी प्रकल्प अंमलबजावणी युनिटाक म्हायती दिवपाक सांगलां.
भोम वाठारांत रस्तो रुंदिकरणाक आमचो विरोध आशिल्ल्यान पंतप्रधान कार्यालय आनी राष्ट्रपती कार्यालया कडेन आमी दाद मागल्ली. तांणी संबंदितां कडल्यान रुंदिकरणाची म्हायती मागयल्यान आतां आमकां न्याय मेळपाची आस्त तयार जाल्या अशें सुनील भोमकारान ताचे कडेन संपर्क सादलो तेन्ना सांगलें.
एससी- एसटी आयोगान जाय म्हायती
भोमांतल्या एसटी समाजांतल्या लोकांनी रस्तो रुंदिकरणाक विरोध करपी निवेदन एससी-एसटी आयोगाक निवेदन सादर केल्लें. ते संबंदांत आयोगान काम विभाग 15चो कार्यकारी अभियंत्याक बाणस्तारी- कुंडय मजगतीच्या रस्त्याचोआराखडो आनी हेर तपशील सादर करपाक सांगलां. फाटल्या 22 डिसेंबराक एसटी समाजांतल्या लोकांनी एससी आनी एसटी कायदो 1989च्या कलम 3 खाला भोमांतल्या एसटी समाजांतल्या लोकांनी रस्तो रुंदिकरणांत ताचेंर अन्याय चल्ला अशी कागाळ आयोगाचो अध्यक्ष दीपक करमळकारा कडेन केल्ली. 23 जानेवारीक ताणे कार्यकारी अभियंत्याक पत्र धाडलां. रस्तो रुंदिकरणाच्या कामाक लागून कितलीं आनी कसली बांदकामां मोडटले हें नांवां सयत पत्र मेळल्ल्याच्या पंदरां दिसां भितर सादर करपाक आयोगान सांगलां.
मजगतीं, फोड्याच्या उपविभागीय न्यायदंडाधिकाऱ्यान धाडल्ल्या कारणां दाखय नोटिशेक आव्हान दिवपाचें 22 भोमकारांनी थारायलां अशें ताचो वकील अॅड सुरेल तिळवेन सांगलें. गांवांत सर्वे करपाक बांदकाम खात्याचे अधिकारी आयिल्ले तेन्ना तांणी शांततायेन निदर्शना केल्लीं. ते संबंदींत धाडल्ल्या नोटिशींक जाप दिवपा खातीर 22 भोमकार न्यायदंडाधिकाऱ्याच्या न्यायालयांत आयिल्लें. भोमकार फकत अधिकाऱ्यांक जाप विचारपाक आयिल्लें. ताणी कसलोच अनुचीत प्रकार केलो ना. लोकशायेंत शांततायेन निशेध करपाचो हक्क सगल्यांक आसा. तांचो आवाज अंदूवपाक जायना अशें तिळवेन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
