भांगरभूंय | प्रतिनिधी
गुजरात, खबरां संस्था ः गुजरातांतल्यान एक अजापीत प्रकरण उजवाडाक आयला. हे प्रकरणांत घोवान आपल्या बायलेच्या मरणा खातीर स्वता आड गुन्यांव दाखल केला. नर्मदा जिल्ह्यांत घडिल्ले हे घडणुकेची चर्चा सुरू आसा. कार अपघातांत बायलेक मरण आयलें. ते उपरांत तिच्या घोवान स्वता आड पुलीस स्टेशनांत गुन्यांव नोंद केला.
नेमकें कितें जालें?
आयतारा सकाळीं परेश दोशी आपल्या बायले सयत अंबाजी देवळांत दर्शन घेवपाक गेल्लो. ते परत येताना साबरकंडा वाठारांतल्या खेरोज खेडब्रह्मा राज्य म्हामार्गाचेर एक सुणो गाडये मुखार आयलो. हाका लागून परेश घुसपलो आनी ताणें सुण्याक वाचवपा खातीर गाडी वळयली. ती अचकीत रस्त्या कुशीक आशिल्ल्या डिव्हायडराक वचून आपटली. गाडयेन धपको दिल्ल्यान गाडयेचें दार ऑटो लॉक जालें आनी दोशी आनी ताची बायल दोगांय गाडयेंत आडकलीं. अपघाता उपरांत त्या जाग्यार हाजीर आशिल्ल्या लोकांनी जोडप्याक वांचोवपाचो यत्न केलो. पूण दार उगडलें ना. उपरांत कांय जाणांनी दाराचो हारसो फोडून दोशी आनी ताचे बायलेक भायर काडली अशें दोशी हांणी पुलिसांक सांगलें. हॉस्पिटलांत व्हेली तेन्ना दोतोरान ताचे बायलेक मरण आयिल्ल्याचें सांगलें. म्हजे चुकीक लागून म्हजे बायलेक मरण आयले, देखून हांव म्हजे आड गुन्यांव नोंद करता अशें परेश दोशी हांणी पुलिसांक सांगलें. ह्या प्रकरणांत पुलिसांनी गुन्यांव नोंद केला आनी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
