भारतात येरादारी कोंयडीची समस्या ः बेंगळुरू सवे, पुणे सातव्या क्रमांकाचेर

भांगरभूंय | प्रतिनिधी

डच जियोलोकेशन तंत्रज्ञान टॉमटॉम कंपनीचो अहवाल

नवी दिल्ली, खबरां संस्था ः वाडट्या लोकसंख्येक लागून वाहनांचोय आंकडो वाडत आसा. ताका लागून जायत्या शारांनी लोकांक येरादारी कोंयडीची समस्या जाता. भारताचो विचार केल्यार मुंबय, पुणे, बेंगळुरू, दिल्ली सारकिल्लीं जायतीं शारां येरादारी कोंयडी समस्यांत मुखार आसात. पूण, भारतांतच न्हय तर संवसारांतल्या जायत्या शारांनी हीच स्थिती आसा. अशे परिस्थितींत डच जियोलोकेशन तंत्रज्ञान टॉमटॉम कंपनीन संवसारांतल्या जायत्या देशांतल्या येरादारीची कोंयडी समस्याचेर अहवाल सादर केला. ह्या अहवाला प्रमाण भारताचे टेक कॅपिटल शार बेंगळुरू येरादारी कोंयडीच्या मळार संवसारांत सव्या क्रमांकाचेर आसा. ह्या अहवालांत वेगवेगळ्या देशांतल्या शारांनी येरादारीची कोंयडी विशीं म्हायती दिल्या. हाचे वांगडाच दरेका शारांतल्या वाहनांचो सरासरी गती, प्रवास वेळ आनी येरादारी कोंयडीची पातळीय सांगल्या.
टॉमटॉम ट्रॅफिक इंडेक्सनान सरासरी प्रवास वेळ, इंधन खर्च आनी CO2 उत्सर्जनाचेर आदारीत 6 खंडांतल्या 55 देशांतल्या 387 शारांचें मुल्यांकन केलां. हो अहवाल 600 कोटी परस चड इन-कार नेव्हिगेशन सिस्टम आनी स्मार्टफोनाचेर आदारीत आसा. दरेका शारा खातीर टॉमटॉमान 2023 वर्सा नेटवर्कांतल्यान लाखांनी किलोमीटर प्रवास करपाक लागपी वेळ पसून दर किलोमीटराक लागपी सरासरी प्रवास वेळ काडलो.
ह्या अहवालांत पयल्या 10 शारां मदीं दोन भारतीय शारांची नांवा आसा. 2023 वर्साच्या येरादारी कोंयडीच्या मळार बेंगळुरूचो सवो आनी पुणेचो सातवो क्रमांक आसा. 2023 वर्सा बेंगळुरू शारांत दर 10 किमी सरासरी प्रवासाक 20 मिनटां 10 सेकंद, जाल्यार पुण्यांत तेंच अंतर काडपाक 27 मिनटां 50 सेकंद लागताले.
मजगतीं, ह्या अहवालांत 2022 वर्सा बेंगळुरूचो दुसरो क्रमांक आशिल्लो, पूण 2023 वर्सा येरादारीच्या मळार बेंगळुरु सव्या क्रमांकाचेर पावलो. हे वळेरेंत दिल्ली 44 वे आनी मुंबय 53 वे सुवातेर आसा. अहवाला प्रमाण 2023 वर्सा दिल्लीत दर 10 किमी. प्रवासा खातीर सरासरी 21 मिनटां 40 सेकंद लागतात जाल्यार मुंबयंत 21 मिनटां 20 सेकंद लागतात.
अहवाला प्रमाण हे वळेरेंत लंडन पयल्या क्रमांकाचेर आसा. हांगा दर 10 किमी. सरासरी प्रवासाक 37 मिनटां, जाल्यार डब्लिनांत दर 10 किमी. खातीर 29 मिनटा 30 सेकंद वेळ लागता. हें वळेरेंत डबलिन दुसरें सुवातेर आसा. ताचे उपरांत कॅनडांतल्या टोरंटो शाराचें नांव आसा, हांगा दर 10 किमी. प्रवासा खातीर सरासरी 29 मिनटा इतलो वेळ लागता.