परिक्षेंत फटवणूक केल्ल्यार 5 वर्सां बंदखण आनी 10 लाख रुपया दंड
भांगरभूंय | प्रतिनिधी
पेपर फुटीक आळाबंदा हाडपाक संसदेंत विधेयक
नवी दिल्ली, खबरां संस्था ः भौशीक परिक्षेत पेपर फुटप, कॉपी करप आनी बनावट वेबसायटी तयार करप अशा गुन्यांवकारी कृत्यांक आळाबंदा हाडपा खातीर सोमारा संसदेंत विधेयक मांडलें. ताचे खाला परिक्षेंत फटवणूक केल्ल्या प्रकरणांत गुन्यांवकार थारिल्ल्यांक उण्यांत उणी 5 वर्सां बंदखण आनी 10 लाख रुपया दंड भरचो पडटलो.
आसाम सरकारुय बेगीनूच भौशीक परिक्षेंत जावपी फटवणूक आडावपा खातीर खर कायदे करतले. ह्या कायद्याचें नांव आसाम पब्लिक एक्झामिनेशन (मीन्स टू प्रीव्हेंट इनफेअर प्रॅक्टिसेस इन रिक्रूटमेंट) विधेयक, 2024. हाचे खाला उमेदवाराचेरच न्हय, तर परिक्षा घेवपी प्राधिकरणाचेरूय गुन्यांव दाखल करूं येता.
ह्या विधेयकांत 5 ते 10 वर्सां बंदखण आनी 10 लाख ते 1 कोटी रुपया मेरेन दंडाची तजवीज आसा अशें आसाम सरकारान सांगलां. फटोवपी उमेदवाराक ख्यास्त उणी आसा. तीन वर्सां बंदखण आनी एक लाख रुपया दंड. पूण दंड भरलो ना जाल्यार ताका आनीक दोन वर्सां बंदखणींत रावचें पडटलें. तशेंच ह्या कायद्या खाला गुन्यांवकार थारल्यार त्या व्यक्तीक दोन वर्सां खंयचीच भौशीक परिक्षा दिवंक मेळची ना. गुन्यांवकार थारिल्ले संस्थेचेर कायमचे बंदी घालूं येता.
प्रस्तावीत विधेयकांत परिक्षा दिवपी लोक कसल्यो चुको करुंक शकता हें स्पश्ट केला. हातूंत पेपर लीक करपाचो यत्न करप, प्रस्नपत्रिका खरेदी करप, विकप वा छापप, तो सोडोवप, उमेदवाराक खंयच्याय चुकीच्या पद्दतीन मजत करप, नियुक्त परिक्षा केंद्रा भायर हेर सुवातेर वा नियुक्त छापणावळ सोडून हेर सुवातेर परिक्षा घेवप, प्रस्नपत्रिका वा रिकामे उत्तरपत्रिका छापप हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
