भांगरभूंय | प्रतिनिधी
मंत्री विश्वजीत राणेः चार शारांचे मास्टर प्लान तयार आशिल्ल्याचो दावो
भांगरभूंय । प्रतिनिधी
मडगांवः शाराची उदरगत करपाची आसत जाल्यार जागरूक लोकांचो आदार गरजेचो आसता. मडगांवचे लोक जागरूक आसात. मडगांव पालिके सयत मडगांवचे लोक, तरणाट्यांची उदरगती संबंदांतली विचारधारा समजून घेवपाची गरज आसा. शाराची उदरगत करचे खातीर बेस प्लान आसचो हे खातीर चार शारांचे मास्टर प्लान तयार केल्यात. तातूंत उदरगतीचीं कामां कशी मुखार व्हरतले, तें कळटलें, अशें नगर नियोजन मंत्री विश्वजीत राणे हांणी सांगलें.
मडगांवां नुतनीकरण केल्ल्या अॅना फोंत गार्डना सयत म्युझिकल फावंटनाचें उक्तावण केलें. ह्या वेळार मंत्री राणे उलयताले. तांच्या वांगडा गोंय राम वेवस्थापन म्हामंडळाची अध्यक्ष तशेंच पर्येंची आमदार डॉ. देविया राणे, आमदार दिगंबर कामत, नगराध्यक्ष दामोदर शिरोडकार हाजीर आशिल्ले.
दिगंबर कामत हे सादे पुरूस न्हय जाल्यार विकास पुरुस आसात. मुख्यमंत्री म्हूण काम करतना गोंयची तांणी उदरगत केल्या. गोंय चलयिल्लो असो आमदार मडगांवकारांक मेळ्ळा. गोंयची उदरगत सगळ्यांनी एकठांय येवन करपाची गरज आसा. फक्त उलोवन उपेगाचें ना, लोकां खातीर काम करपाचें उदिश्ट दवरून काम करता. मडगांव शाराची उदरगत जावचे खातीर मडगांवचो आमदार वावुरता. अॅना फोंत गार्डनाक एक इतिहास आसा. ताचो सांबाळ करपाची गरज आसा. रान खात्या वतीन देखभाल करतले. अॅना फोंत गार्डनाचे देखभालीचें काम तीन वर्सां जी सुडा कडल्यान निधींतल्यान करतले, अशें मंत्री राणे हांणी सांगलें.
लोकां खातीर किते तरेन बरे करचे खातीर आमदार आनी मंत्री आसतात. काम करतना लोकांची इत्सा कितें आसा, हें लक्षांत घेतात. सगळीं हॉस्पिटलां एकामेकां कडेन संलग्न आसचीं. खाजगी मॅडिकल कॉलेज हाडून गरजेचे मनीसबळ उपलब्ध करपाचो यत्न आसा. साडेचार लाखांचें कॅन्सर उपचाराचें इंजेक्सन गोंयांत रुग्णां खातीर फुकट दिवपाचो निर्णय घेतला. जी सुडाच्या माध्यमांतल्यान गरजेचो निधी अॅना फोंत गार्डनाच्या नुतनीकरणा खातीर दिला, अशें मंत्री राणे हांणी सांगलें.
दिगंबर कामत हांकां सदांकाळ आदारः राणे
मडगांव शाराची उदरगत हें राज्य सरकारान आमदार दिगंबर कामत हांकां आस्वासन दिला. तांच्या मनांत जे तरेन मडगांवची उदरगत करपाची आसा, ते खातीर गरजेचे सगळे तरेचो आदार करतले. ते जें सांगतले त्यो गजाली फुडें व्हरपाक केन्नाच फाटीं सरचे नात. कामत हांकां गरजेचो सगळे तरेचो आदार दितले, अशें मंत्री विश्वजीत राणे हांणी सांगलें.
स्टुडियो पॉड कंपनी वतीन मास्टर प्लानः कामत
मडगांव शाराचो मास्टर प्लान स्टुडियो पॉड कंपनी कडल्यान तयार केला, आपणे करूंक ना. पालिका नगरसेवकांक दाखयलो. ते उपरांत तंत्रीक तज्ञ, आर्किटेक्चर, अभियंते, वेवसायिकांक दाखयला. आतां कांय जाण सांगतात, तो सगळ्यांक दाखोवपाक जाय. पूण तशें करपाक मेळचे ना. शाराचे उदरगती खातीर मास्टर प्लान तयार केला, अशें मत आमदार दिगंबर कामत हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
