भांगरभूंय | प्रतिनिधी
अमीत पाटकारः गोंयाचेर 36 हजार कोटींचें रीण जाल्ल्याचो दावो
भांगरभूंय । प्रतिनिधी
मडगांवः प्रधानमंत्री नरेंद्र मोदी हांचे भोंवडेचे फाटभुंयेर भाजपा सरकार विकसीत भारत ह्या नांवा खाला लोकांच्या पयशांचो वापर करून भाजप सरकार पक्षाचो प्रचार करता, असो आरोप काँग्रेस प्रदेशाध्यक्ष अमीत पाटकार हांणी केला.
दक्षीण गोंय जिल्हो काँग्रेस कार्यालयांत पत्रकार परिशद घेवन प्रदेशाध्यक्ष पाटकार हांणी भाजपा सरकाराचे भुमिकेचेर टिका केली. ह्या वेळार दक्षीण गोंय जिल्होध्यक्ष सावियो डिसिल्वा, अमरनाथ पणजीकार हाजीर आशिल्ले.
प्रधानमंत्री मोदी हांणी म्हणलां, राज्य सरकारांचेर परतून परतून भ्रश्टाचाराचे आरोप जातात. हे आदीं आदले राज्यपाल सत्यपाल मलीक हांणी गोंयांत भ्रश्टाचार चल्ल्यात, अशें सांगिल्लें. ते उपरांत लोकायुक्तान भ्रश्टाराचीं 21 प्रकरणां उक्तीं केल्लीं. ते उपरांत आतां सभापती तवडकार हांणी सरकारांतल्या मंत्र्याचेर भ्रश्टाचाराचे आरोप केले. ते उपरांत भाजपा प्रदेशाध्यक्ष सदानंद शेट तानावडे हांणी एकवटींत बसका घेवन प्रकरण मिटलां, अशें म्हणलां. हाचो अर्थ तांणी भ्रश्टाचाराचे आरोप मान्य केल्यात, असोच जाता, अशें पाटकार हांणी सांगलें.
निती आयोगाच्या अहवालांत गोंय बेरोजगारींत मुखार आसा. तरणाट्यांक नोकऱ्यो कश्यो दितले, तें सांगचें. म्हादयच्या उदका खातीर गोंयचो लडो चालू आसा. कर्नाटकाचो डीपीआर रद्द करतले काय ना, हाची जाप दिवची. म्हादय अभयारण्य वागां खातीर राखीव दवरचें, गोंयकारांक नाकाशिल्ले तिनूय प्रकल्प रद्द करचे, न्हंयांच्या राष्ट्रीयकरणा विशीं भुमिका स्पश्ट करची, गोंयांतले गुन्यांवकारींत वाड जाल्या, खून आनी बलात्काराच्यो घडणुको वाडल्यात. तेचवरी 2005 त गोंयाचेर 5 हजार कोटींचें रीण आशिल्लें तें आतां वाडून 36 हजार कोटी जालां, हें विशींय प्रधानमंत्री मोदी हांणी उलोवचें. भाजपा सरकार लोकांच्या पयशांतल्यान विकसीत भारत कार्यावळ करून भाजपाचो प्रकार करता, अशी टिका पाटकार हांणी केली.
‘प्रधानमंत्र्यांचे कार्यावळीक सार्दिन हांचो फोटो कित्याक ना?’
सरकारी कार्यावळ आसतना भाजपाचो प्रचार करपाचो प्रकार चालू आसा. प्रधानमंत्र्यांचे कार्यावळीक मुख्यमंत्री आनी भाजपाच्या दोन खासदारांचे फोटो आसात. पूण दक्षीण गोंय खासदार फ्रान्सीस सार्दिन हांचो फोटो कित्याक ना, हाची जाप सरकारान दिवची. ल्हान ल्हान वेवसायिकांचे वेवसाय आठ ते धा दीस बंद करून सरकार कितें करपाक सोदता, असोय प्रस्न अमरनाथ पणजीकार हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
