भांगरभूंय | प्रतिनिधी
भारतीय गायक शंकर महादेवन आनी तबला वादक झाकीर हुसेन हांकां ६६ व्या ग्रॅमी पुरस्कार सुवाळ्यांत ग्रॅमी पुरस्कार भेटयलो. ह्या दोनूय दिग्गज कलाकारांच्या ‘शक्ती’ बँडच्या ’दिस मोमेंट’ ह्या अल्बमाक उत्कृश्ठ ग्लोबल म्युझीक अल्बमाच्या श्रेणीत हो पुरस्कार मेळ्ळा. ह्या आल्बमांत वट्ट ८ गाणी आसात.
शंकर महादेवन, जॉन मॅक्लॉफलीन, झाकीर हुसेन, व्ही सेल्वागणेश आनी गणेश राजगोपालन हे कलाकार ह्या बँडांत एकवटान काम करतात. ह्या बँडा बगर बासरी वादक राकेश चौरसिया हांणीय दोन ग्रॅमी पुरस्कार जिंकल्यात. ग्रॅमी पुरस्कार हो संगीत मळावयलो सगळ्यांत व्हड पुरस्कार. लॉस एंजेलिस हांगां हो पुरस्कार सुवाळो आयोजीत केल्लो.
४५ वर्सां उपरांत पयलो अल्बम
फ्यूजन बँड शक्तीन ४५ वर्सां उपरांत तांचो पयलो अल्बम रिलीज केलो, जाका सरळ ग्रॅमी पुरस्कार फावो जालो. इंग्लीश गिटार वादक जॉन मॅक्लॉफलिनान भारतीय व्हायोलिन वादक एल. शंकर, तबलावादक झाकीर हुसेन आनी टी.एच. ’विक्कू’ विनायकरामा वांगडा ’शक्ति’ या फ्युजन बँडची सुरुवात केल्ली. मात १९७७ उपरांत हो बँड तितलोय सक्रीय नाशिल्लो.
१९९७ त जॉन मॅक्लॉफलिनान तेच संकल्पनेर परत ‘रिमेम्बर शक्ती’ नांवाचो बँड तयार केलो आनी तातूंत व्ही. सेल्वागणेश (टी.एच. विक्कू विनायकरामचो चलो), मेंडोलीन वादक यू. श्रीनिवास आनी शंकर महादेवन. २०२०त, बँड परत एक जालो आनी ’शक्ती’ म्हणून तांणी ४६ वर्सां उपरांत ताचो पयलो अल्बम ‘दिस मोमेंट’ रिलीज केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
