भांगरभूंय | प्रतिनिधी
युरी आलेमांवः अरिश्ट पयस दवरपाचो काणकोणकारांक उलो
भांगरभूंय । प्रतिनिधी
मडगांवः फुडारांतल्या काणकोणकारां विशीं दया दाखोवन काणकोणाक अरिश्टा पासून वाटावप आतां काणकोणकारांच्याच हातांत आसा. आपूण काणकोणकारां कडेन नमशायेन मागतां, तांणी लोलयेंच्या पर्यावरण संवेदनशील भगवती पठारा वयल्या फिल्म सिटी प्रकल्पा खातीर मंजुरी दिवची न्हय, असो उलो विरोधी पक्ष फुडारी युरी आलेमांव हांणी काणकोणकारांक मारला.
काणकोणकारांनी सत्तरींतल्या शेळ मेळावलीच्या शेतकारां सारकी धीटपणां दाखोवन फिल्म सिटी प्रकल्पाक विरोध करचो. आपल्या गांवची जमीन तुमचे फुडले पिळगे खातीर अशीच आसुंदी, अशें युरी हांणी सांगलें.
मुख्यमंत्री डॉ. प्रमोद सावंत हांणी फिल्म सिटीचो सविस्तर प्रकल्प अहवाल (डीपीआर) तशेंच इफ्फी आनी ईएसजीचेर श्वेतपत्रिका काडच्यो. हाचे वयल्यान फिल्म सिटी प्रकल्पाचो गोंयाक कसो फायदो जातलो हाचेर उजवाड पडटलो. फाटल्या 20 वर्सांत इफ्फी आनी ईएसजीन कितें मेळयलें, हें लेगीत हाचे वयल्यान स्पश्ट जातलें, असो दावो युरी हांणी केला. फाटल्या 20 वर्सांत सरकारान इफ्फी आनी ईएसजीचेर सुमार 1500 कोटी रुपया खर्च केल्यात. दर वर्सा सरकार महोत्सवाच्या आयोजनाचेर राज्य आनी थळाव्या चित्रपट निर्मात्यांक कसलोच फायदो जायनासतनाय सुमार 50 कोटी रुपया खर्च करता, अशेंय तांणी सांगलें. सुमार 10 वर्सां सावन गोंय चित्रपट अनुदान येवजण ईएसजीन गुंठलावन दवरल्या. ईएसजीन फाटल्या 20 वर्सांत कितल्यो नोकऱ्यो आनी रोजगाराच्यो संदी निर्माण केल्यात? फिल्म सिटीक लागून नोकऱ्यो निर्माण जातल्यो, असो दावो करपी सरकाराक काणकोणकारांनी हो प्रस्न विचारचो. कन्व्हेन्शन सेंटराचें कितें जालें हें सरकारान स्पश्ट करपाची गरज आसा. 2019 त 50 व्या इफ्फी वेळार ह्या प्रकल्पाचें उक्तावण करपाचें भाजपा सरकारान जाहीर केल्लें. फाटल्या कितल्याश्याच वर्सां सावन राज्य चित्रपट महोत्सव कित्याक आयोजीत करिनात? गोंयचे चित्रपट इफ्फीच्या अधिकृत विभागांत कित्याक दाखयनात, अशे प्रस्न विरोधी पक्ष फुडाऱ्यांनी उपस्थीत केल्यात.
फिल्म सिटी ही काळा भायली संकल्पनाः युरी
प्रगत तंत्रज्ञानाच्या आदारान आतां चित्रपट निर्मात्यांक कंप्युटराचेर सगळें कितें तयार करपाची सुविधा मेळटा. बाजारांत व्हड प्रमाणांत उपलब्ध आशिल्ल्या सॉफ्टवॅराचो वापर करून खंयचीय जाय थंयची सुवात वा सॅट कंप्युटराचेर करपाक मेळटात. चित्रपट निर्माते आतां नाविन्यपूर्ण कल्पना स्विकारू निर्मिती खर्चांत बचत करतात. कृत्रीम तरेन तयार केल्ल्या लोकेशन सॅटा सयत फिल्म सिटी ही संकल्पना आतां काळा भायली जाल्या, अशें युरी आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
