भाजपा वेंचणूक आव्हान म्हूण स्विकारता

भांगरभूंय | प्रतिनिधी

सदानंद शेट तानावडेः ईव्हीएमाक बोट दाखोवन वेंचणुको जिखपाक मेळनात

भांगरभूंय । प्रतिनिधी

मडगांवः भाजपा हो वेंचणुके पुरती तयारी करपी पक्ष न्हय, जाल्यार दरेक कार्यकर्तो कश्ट घेता. दरेक वेंचणूक भाजप आव्हान म्हूण स्विकारता. पक्षाच्या चिन्नाचेर लोकां मेरेन पावपाचो यत्न करतात. केंद्रा पासून निमाण्या कार्यकर्त्या मेरेन सगळे जाण पक्षा खातीर काम करतात. सत्ता आयले उपरांत लोकां खातीर काम करीत रावप आनी लोकां मेरेन पावोवपाचें काम करतात, अशें भाजपा प्रदेशाध्यक्ष तशेंच राज्यसभा खासदार सदानंद शेट तानावडे हांणी सांगलें.

मडगांवां घेतिल्ले पत्रकार परिशदेंत तानावडे उलयताले. ह्या वेळार तांणी प्रधानमंत्री नरेंद्र मोदी हांचे सभे विशीं म्हायती दिली. ह्या वेळार आदले खासदार नरेंद्र सावयकार आनी दामोदर नायक हाजीर आशिल्ले. ह्या वेळार विधानसभेच्या अभिभाशणांत राज्यपाल पी. एस. श्रीधरन पिल्लई हांणी गोंय सरकाराच्या कामाचें कवतूक केलें. ताका लागून तांकां परबीं दिवपाचो थाराव घेतिल्ल्याचेंय तांणी सांगलें.

पक्षाचो वावर करून, पक्ष घटमूट करून वेंचणुको जिखपाक मेळटा. ईव्हीएमा कडेन बोट दाखोवन, इंडीया आघाडी करून वेंचणुको जिखपाक मेळना. भाजपांत उमेदवार थारले उपरांत काम करिनात जाल्यार वेंचणूक केन्नाय जाहीर जाली तरीय पक्ष तयार आसता. उमेदवार निवडीची भाजपाची प्रक्रिया आसा. केंद्रांतली संसदीय समिती, राज्यांतली वेंचणूक समिती हांचे कडल्यान ती पुराय जातली. लोकसभा वेंचणुकेंत गोंयांतल्यो दोनूय सुवातो भाजप भोवमतांनी जिखतलो, असो दावो तानावडे हांणी केलो.

ममता बॅनर्जी हांणी सकाळींच एके पत्रकार परिशदेंत काँग्रेसीक 300 तल्यो 40 सुवातो लेगीत जिखची ना, अशें म्हणलां. पंजाबांत आम आदमी पार्टीन स्वबळार वेंचणूक लडपाचें जाहीर केलां. बिहारांत लेगीत परिस्थिती बदलिल्ली ना. ताका लागून काँग्रेसीची सध्याची स्थिती वायट जाल्या. हेच निरशेवणेंतल्यान ईव्हीएमा वयले आरोप जातात. देशांतले कांय एनजीओ आनी कार्यकर्ते हे विरोध करतात, पूण सत्य सगळ्यांक खबर ना. ईव्हीएमांत फेरफार करपाक मेळटा जाल्यार कर्नाटक आनी तेलंगणांत लेगीत भाजपाच जिखतलो आसतलो.

गोंय मुक्ती उपरांत खंयच्याय सरकारान सेगीत तीन खेपे स्थापन केल्लें ना, तें भाजपान केलां. अशें आसून लेगीत भाजपाचे कार्यकर्ते सुस्त बशिल्ले नात, ते पक्षाचें काम करीत आसात. गोंयच्या चाळिसूय मतदारसंघांतल्या सगळ्या बुथांचेर 11 फेब्रुवारीच्यान वचपाचें निश्चीत केलां. मुख्यमंत्र्यां सयत मंत्री आनी वरिश्ठ फुडाऱी बुथांचेर वचीन पक्ष संघटणेचें काम करतले, अशेंय तानावडे हांणी स्पश्ट केलें.

प्रधानमंत्री करतले तीन प्रकल्पांचें उक्तावण

प्रधानमंत्री नरेंद्र मोदी गोंयांत येतात, तांच्यो दोन कार्यावळी थारिल्ल्यो आसात. बेतूल वाठारांत एनर्जी विक परिशदेंचें उक्तावण केले उपरांत प्रधानमंत्र्यांची विकसीत भारत विकसीत गोंय ही सभा मडगांवां जातली. हे सभे वेळार गोंयांतल्या नॅशनल इन्स्टिट्यूट ऑफ वॉटर स्पोर्टस्, कुडचडें- काकोडें कोयर वेवस्थापन प्रकल्प आनी एनआयटी कुंकळ्ळी ह्या तीन प्रकल्पांचें प्रधानमंत्र्यां हस्तुकीं उक्तावण जातलें. तशेंच शेळपें साळावलीच्या 100 एमएलडी उदक शुद्धिकरण प्रकल्प, कांपाला वयल्यान रेईश मागूस किल्ल्या म्रेरेन पॅसेंजर रोप वे ह्या दोन प्रकल्पां खातीर प्रधानमंत्री मोदी हांचे हस्तुकीं व्हर्च्युयली बुन्यादी फातर बसयतले.

ईव्हीएमाच्या नांवान गरजे भायर आरड

भारतीय जनता पक्ष जेन्ना एकादी वेंचणूक जिखता, तेन्ना विरोधी पक्ष ईव्हीएमा कडेन बोट दाखयतात. पूण ज्या वेळार विरोधी पक्ष जिखता, तेन्ना तें ईव्हीएम खरें आसता. कर्नाटक, तेलंगणांत काँग्रेस जिखलो, त्या वेळार ईव्हीएम योग्य जाता आनी भाजप वेंचणुको जिखता तेन्ना ईव्हीएमाच्या नांवान आरड मारपाची, अशें चालू आसा. ह्या आरोपांत कांयच तथ्य ना, अशें सदानंद शेट तानावडे हांणी सांगलें.