भांगरभूंय | प्रतिनिधी
दोगां दुबावितांक वाशी मुंबयंत गुन्यांव फांट्यान केली अटक
भांगरभूंय । प्रतिनिधी
म्हापशें: मार्रा- पिळर्णा होरिझन्स आझूरा व्हिला प्रकल्पांतल्या एका व्हिलाचे धनी निथोथम सिंग (निम्स) ढिल्लो (77. रा. पंजाब) ह्या होस्पिलिटी वेवसायिकाचो खून केलो. निम्स हांचो खून करून पळून वचपी दुबावीत बायल आनी दादल्याक तांचे कडले मोटारी सयत वाशी टोल नाक्यार नवी मुंबय गुन्यांव फांट्याच्या पुलिसांनी ताब्यांत घेवन अटक केली.
आयतारा 4 फेब्रुवारीक सकाळीं 8 वरांच्या सुमाराक ही घडणूक उजवाडाक आयली. सकाळीं घर कामगार कामार आयले तेन्ना धनी निम्स ढिल्लो आपले खाटीचेर पडिल्ले अवस्थेंत तांकां दिसले. ही घडणूक तांणी शेजारच्या व्हिलांच्या लोकांक तशेंच निम्स हांचे होप्लिलिटी कंपनीची वेवस्थापक फिर्यादी सीमा सिंग हांकां दिली. ताकतिकेन तिणें घडणुकेचे सुवातेर येवन पर्वरी पुलिशेक घडणुकेची म्हायती दिली.
शेनवारा 3 फेब्रुवारीक राती ह्या व्हिलांत ढिल्लो हांकां मेळपाक तांचे कांय गेस्ट आयिल्ले. ते राती उसरां मेरेन पार्टी करताले. ते उपरांत दुसऱ्या दिसा आयतारा ढिल्लो हे आपले खाटीर दुबावीत तरेन मरण आयिल्ले स्थितींत सांपडले.
घडणुकेची म्हायती मेळटाच तत्काळ पुलीस उपअधिक्षक विश्वेश कर्पे, निरिक्षक राहूल परब हांणी सांगाती पुलिसां वांगडा घडणुकेचे सुवातेर धांव मारली. ढिल्लोचे कुडीचेर कांय घावे, तशेंच ताच्या आंगा वयली सरपळी आनी हातांतलें कडें ह्या भांगराचे वस्ती सयत मोबायल फोन तशेंच रेण्ट अ कार मोटारी गायब आशिल्ल्याचें पुलिसांच्या लक्षांत आयलें.
पुलीस अधिक्षक निधीन वाल्सन, अधिक्षक सुलेखा जगरवाल हांणीय घडणुकेचे सुवातेर भेट दिवन कनिश्ठ पुलिसांक तपास वावरांत गरजेच्यो सुचोवण्यो केल्यो. पुलिसांनी ठसे तज्ञ आनी वास काडपी सुण्याच्या पंगडाचो वापर केलो. तेचवरी गुन्यांव नोंद केलो.
प्रथमदर्शनी हो खुनाचोच प्रकार आशिल्ल्याचो दुबाव उक्तावन पुलिसांनी शेनवारा ढिल्लोच्या व्हिलाचेर आयिल्ल्या गेस्टांची म्हायती मेळयली. रातीं उसरां एक दादलो आनी बायल आयिल्ल्याचें चवकशेंत कळ्ळें. ते प्रमाण पुलिसांनी तपास सुरू केलो. त्याच वेळार ती रेण्ट अ कार धनयान आपली मोटार गोंया भायर मुंबयचे दिशेन वता, अशी म्हायती पुलिशेक दिली. ते मोटारीचेर जीपीएस बसयिल्लो. रोखडेंच गोंय पुलिसांनी मुंबय गुन्यांव फांट्याच्या पुलिसां कडेन संपर्क करून ते गाडयेची म्हायती दिली. गोंय- मुंबय म्हामार्गा वयल्या वाशी टोल नाक्यार ती मोटार पावताच ती नवी मुंबय गुन्यांव फांट्याच्या विभागान ताब्यांत घेतली. झडटे वेळार दुबाविता कडेन ढिल्लो हांच्यो चोरयेक गेल्ल्यो वस्तू सांपडल्यो. चवकशे वेळार ढिल्लोच्या खुनांत दुबाविताचो हात आशिल्ल्याचें स्पश्ट जाले उपरांत त्या दोगांकूय अटक केली. त्या दुबावितांक गोंयांत हाडचे खातीर आयतारा सांजे वेळार पर्वरी पुलीस पंगड नवी मुंबय वचपाक भायर सरलो.
मार्रा- पिळर्णा व्हिलांत निम्स ढिल्लो हे दुबावीत स्थितींत बेडरुमांत मरण आयिल्ले दशेंत सांपडले. तांच्या आंगा वयल्यो भांगराच्यो वस्ती, मोबायल फोन आनी रेण्ट अ कार गायब आशिल्ली. ह्या प्रकरणांत नवी मुंबयच्या गुन्यांव फांट्याच्या आदारान दादलो आनी बायल अश्या दोगांक अटक केल्या. ह्या प्रकरणांत पर्वरी पुलिसांनी खून आनी चोरयेचो गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
