भांगरभूंय | प्रतिनिधी
फुडल्या पांच वर्सां खातीर चालीक लावपाची उपसभापतीची हमी
भांगरभूंय । प्रतिनिधी
म्हापशें: म्हापशें मार्केटा खातीर 40 केएलडी तांक आशिल्लो घाणयारें उदक प्रक्रिया मिनी प्रकल्पा (ईटीपी) खातीर उपसभापती ज्योशुआ डिसोझा हांचे हस्तुकीं बुन्यादी फातर बसयलो. ह्या वेळार नगराध्यक्ष प्रिया मिशाळ, उपनगराध्यक्ष विराज फडके, नगरसेवक सुधीर कांदोळकार, सुशांत हरमलकार, आशिर्वाद खोर्जुवेंकार, डॉ. नूतन बिचोलकार, बार्बरा कारास्को, ईटीपीचे गौरव पोकळे आनी हेर मानेस्त हाजीर आशिल्ले.
हो प्रकल्प बाजारांतलीं चार भौशीक शौचालयां, चिकन, मटण आनी मांस स्टॉल्सां वरवीं निर्माण जावपी घाणयाऱ्या उदकाचेर प्रक्रिया करतलो. मार्केटांतल्या घाणयाऱ्या उदकाचो विलो लावपा विशीं कसलीच ठोस उपाय येवजण करूंक नाशिल्ल्यान वेळावेळार पालिकेक टिका सोंसची पडटाली. हे सुवातेर सुमार 250 परस अदीक नुस्तें, चिकन, मटण, बीफ विक्रेते आसात. त्या विक्रेत्यां कडल्यान निर्माण जावपी घाणयाऱ्या उदकाचो विलो लावचे खातीर हो मिनी प्रकल्प आसा.
उपसभापती ज्योशुआ डिसोझा हांणी सांगलें, नुस्तें मार्केटांतल्या घाणयाऱ्या उदकाचेर ईटीपी प्रकल्पाच्या माध्यमांतल्यान प्रक्रिया जातली. ह्या उदकाचो उपरांत झाडां आनी शिंपणावळी खातीर पुनर्वापर करतले. ह्या प्रकल्पा खातीर सुमार 61 लाख रुपया खर्च येतलो. फुडल्या पांच वर्सां खातीर हो प्रकल्प चालीक लायतले. नगराध्यक्ष प्रिया मिशाळ हांणी सांगलें, मार्केट वाठार हो खोलगट वाठार आशिल्ल्यान थंय उदक जिरपाची शक्यताय आसा. हे खातीर हो ईटीपी प्रकल्प मार्केटा खातीर वरदान थारतलो. तीन म्हयन्यांत हो प्रकल्प पुराय जातलो. ताचेर 15 व्या वित्त आयोगाचो अनुदान निधी वापरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
