भांगरभूंय | प्रतिनिधी
खबरां संस्था
कोलकाताः स्पोर्टिंग दी गोवान आयतारा आय लीग सेकंड विभागीय सर्तींत कोलकाता हांगा कल्याणी स्टेडियमाचेर जाल्ले मॅचींत युनायटेड एससीक 2-0 अशा गोलांनी हारयलें. हाचे पयलीं सोर्टिंगाक मॅचीचेर वर्चस्व दवोरून लेगीत गुण क्रमवारींत पयले सुवातेर आशिल्ल्या बंगळुरू युनायटेड कडल्यान 1-0 अश्या गोलांनी हार खावची पडल्ली.
युनायटेड एससी आडचे आयतारा जाल्ले मॅचींत स्पोर्टिंगान आपणी रणनिती मैदानार जाय तशी चालीक लागली. रोहन रॉड्रिग्जान डाव्या फळेंतल्यान अॅलिस्टर अँथनीक पास दिल्या उपरांत ताणे हे संदीचो फायदो घेत 33 व्या मिनटाक गोल करून स्पोर्टिंगाक 1-0 अशी आघाडी मेळोवन दिली. तृतीय आय लीग जैतिवंत स्पोर्टिंगान आपल्या आक्रमक खेळान युनायटेड एससीक नाका करून सोडलें. बिस्वा दरजीन युनायटेडाचे बचाव फळेर सेगीत चेंपण हाडलें आनी 40 व्या मिनटाक स्पोर्टिंगाचो दुसरो गोल केलो.
स्पोर्टिंग दी गोवाची फुडली मॅच 8 फेब्रुवारीक गोंयांत महाराष्ट्र ऑरेंज एफसी आड जातली. उपरांत गोवन डर्बींत 12 फेब्रुवारी तांका धेंपो एससी कडेन खेळचें पडटलें. आयताराच्या जैता उपरांत गुण क्रमवारींत 4 मॅचींतल्यान 7 गुणां सयत स्पोर्टिंग दुसरे सुवातेर आसा. बंगळुरू युनायटेड 9 गुणांनी पयले सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
