यशस्वी, बुमराच्या नेटार भारत मुखार

भांगरभूंय | प्रतिनिधी

यशस्वी जयस्वाल (209) आनी जसप्रीत बुमरा (6 विकेटी) हांच्या प्रदर्शना नेटार भारतान इंग्लंडा आडचे दुसरे टॅस्टींत 171 धांवड्यांची म्हत्वाची आघाडी घेतल्या.

दुसऱ्या दिसाचो खेळ सोंपलो त्या वेळार भारतान आपल्या दुसऱ्या डावांत बिनबाद 28 धांवड्यो केल्यात. मुखेली रोहीत शर्मा 13 आनी यशस्वी जयस्वाल 15चेर खेळटा.

मजगतीं, भारतान काल सकाळीं आपलो पयलो डाव 6 बाद 336 धांवड्यां वयल्यान मुखार व्हरपाक सुरवात केली. यशस्वी 179 धांवड्यांचेर आनी आर आश्विन 5 धांवड्यांचेर नाबाद आशिल्लो. दिसाच्या पयल्या सत्रांत यशस्वीन आपलो दोट्टी शेंकडो पुर्ण केलो. आश्विनान 20 धांवड्यांचें योगदान दिलें. कुलदीप यादवान 8 धांवड्यो केल्यो. अशे तरेन उरिल्ल्या बॅट्समनांनी आनीक 60 धांवड्यांची भर घाल्ल्यान भारताचो पयलो डाव 396 मेरेन पावलो.

इंग्लंडा वतीन शोएब बशीर, रेहान अहमद आनी जेम्स अॅण्डरसन हांणी दरेकी 3 विकेटी घेतल्यो. टॉम हार्टलेन एक विकेट घेतली.

भारताच्या 396 धांवड्यांचो फाटलाव करपी इंग्लंडान आपल्या पयल्या डावाक बरी सुरवात केली. इंग्लंड जलद रितीन धांवड्यो करपाक लागिल्लो. पूण, जसप्रीत बुमरान दोन विकेटी घेवन भारताक मॅचींत हाडलो. जेवणाच्या विसवा उपरांत कुलदीप यादवान बेन डकेटाक (21) बाद केलो. पूण, दुसरे वटेन जॅक क्रॉलेन आक्रमक बॅटींग करप चालूच दवरिल्ली. ताणें 11 चवके आनी दोन सके मारले. इंग्लंडान धांवगती प्रती ओव्हर पांच धांवड्यो अशी दवरिल्ली. पूण, बुमरान जो रुटाक (5) आनी उत्कृश्ट फॉर्मांत आशिल्ल्या ओली पोपाक (23) बाद करून इंग्लंडाचे धांवगतीक अंकूश लायलो.

दुसऱ्या सत्रांत क्रॉलेन आक्रमक बॅटींग करून भारताचेर चेपण दवरपाचें काम केलें. ताणें कुलदीप यादवाचे बॉलिंगेचेर सको मारून आपलो अर्द शेंकडो पुर्ण केलो. आश्विनाची लेगीत बॉलींग फोडून काडली. ते उपरांत अक्षर पटेलाक चवको मारून येवकार दिलो. पूण, ते उपरांत सको मारपाच्या यत्नांत श्रेयस अय्यराक कॅच दिवन तो तंबूंत परतलो. क्रॉले 76 धांवड्यो केल्यो. मुखेली बेन स्टोक्सान 47 धांवड्यांचें योगदान दिलें. टॉम हार्टलीन 21 धांवड्यो केल्यो. उरिल्ले बॅट्समनांक व्हड खेळी करपाक जमली ना, अशे तरेन इंग्लंडाचो पयलो डाव 253 धांवड्यांचेर सोंपलो.

भारता वतीन बुमरान स विकेटी घेतल्यो, जाल्यार कुलदीप यादवान तीन आनी अक्षर पटेलाक एक विकेट फावो जाली.