भांगरभूंय | प्रतिनिधी
डब्ल्यूएचओच्या आंकडेवारीतल्यान स्पश्ट
नवी दिल्ली, खबरां संस्था ः कॅन्सर इतलो नेटान पातळ्ळा की भारतांत आतां मेरेन एका वर्सात णव लाख लोकांक कॅन्सरान मरण आयलां अशी धक्को दिवपी आंकडेवारी आयल्या. आतां मेरेन 14 लाख दुयेंतींक कॅन्सराची लागण जाल्या. हे संबंदी संवसारीक भलायकी संघटनेन (डब्ल्यूएचओ) संवसारीक कॅन्सराची आंकडेवारी दिल्या. भारतांत 2022 वर्सा 14.1 लाख नवे कॅन्सर दुयेंती आनी 9.1 लाखां परस चड लोकांक मरण आयलां. तातूंत स्तनाच्या कॅन्सराचें चड प्रमाण आसा.
मजगतीं, इंटरनॅशनल एजन्सी फॉर रिसर्च ऑन कॅन्सर (IARC) च्या अदमासा प्रमाण संवसारीक भलायकी संघटनेच्या कॅन्सर एजन्सीं प्रमाण तोंड आनी फुफ्फुसांचो कॅन्सर दादल्यां मदीं चड प्रमाणांत दिसून येता. दुसरे वटेन स्तन आनी गर्भाशयांतलो कॅन्सर बायलां मदीं चड प्रमाणांत आशिल्ल्याचें दिसून आयलां.
तशेंच भारतांत कॅन्सराचें निदान जाले उपरांत 5 वर्सां भितर जियेवपी लोकांचो आंकडो सुमार 32.6 लाख आशिल्लो. संवसारभर सुमार 2 कोटी नवे कॅन्सर दुयेंती मेळ्ळे आनी 97 लाख लोकांक मरण आयिल्ल्याचो अदमास एजन्सींतल्यान काडला.
कॅन्सराक जापसालदार आशिल्ल्या 34 घटकां मदीं धूम्रपान, सोरो आनी प्रदूषक हीं मुखेल घटकां आशिल्ल्याचें दिसून आयलें. संशोधकांच्या मतान बांगलादेश, नेपाळ, भारत ह्या दक्षीण आशियांतल्या देशांनी गुटखा, पान मसाला, काळो तंबाखू हांचे सेवन करप हे हुस्क्याचें आसा. 2019 वर्सा संवसारभरांतल्या वट्ट मरणांतलीं 32.9 टक्के मरणा भारतात जाल्यार ओंठ आनी तोंडाचे कॅन्सराचे 28.1 टक्के नवें दुयेंती भारतांत आसा. ‘कोलन कॅन्सराचे 50 टक्क्यां परस चड दुयेंती तंबाखू सेवनाक संबंदीत आसात. हालींच्या काळांत भारतांत ताचें प्रमाण वाडपाक लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
