भांगरभूंय | प्रतिनिधी
मुंबय, खबरां संस्था ः ‘चिनी गुप्तहेर’ आशिल्ल्याच्या आरोपा खाला एका पारव्याक आठ म्हयने मुंबयच्या बंदखणींत दवरलो. आतां ‘पेटा’ इंडियाच्या मध्यस्थी उपरांत ताची सुटका केल्या. मे 2023 वर्सा चेंबूरांतल्या पीर पाऊ जेटी लागसार आरसीएफ पुलिसांनी पारव्याक धरलो. तांकां सुकण्याच्या पिसांचेर अस्पश्ट अक्षरांत बरयल्लो संदेश मेळ्ळो, जो चीनी भाशेंत आशिल्ल्याचो दुबाव आसलो. तशेंच सुकण्याच्या पांयात तांबें आनी अॅल्युमिनियम हांचीं दोन रिंग्ज जोडिल्लीं आसली आनी ताचेरय चीनी शैलींत संदेश बरयल्लो.
तपासा वेळार पारवो ‘चिनी गुप्तहेर’ असो दुबाव आशिल्ल्यान ताका ‘केस प्रॉपर्टी’ म्हूण परळांतल्या बाई सक्करबाई दिनशॉ पेटिट हॉस्पिटल फॉर अॅनिमल्स (बीएसडीपीएचए) हांगा धाडलो. वैजकी तपासणी करून ताका ‘बंदखणीत’ दवरलो. अजून तपास केल्या उपरांत पुलिसांच्या चवकशेंतल्यान कळ्ळें की हो तैवानांतलो रेसिंग पारवो आसूं येता आनी सर्तीच्या वेळार तो मुंबयंत पावलो आनी थंय ताका धरलो.
हॉस्पिटलान सांगलें, हो पारवो भलायकेन बरो आशिल्ल्याचें सांगून ताका कारण नासतना बांदखणीत दवरला आनी ताका परतून मळबांत सोडपा खातीर आरसीएफ पुलीस स्टेशनांतल्यान परवानगी घेतली, पूण ताका योग्य प्रतिसाद मेळ्ळो ना. पेटाच्या (PETA) सलोनी साकारियाक ही विचित्र गजाल कळ्ळी तेन्ना तिणें सुकण्याचें स्वातंत्र्य सुरक्षित करपा खातीर वावर सुरु केलो. तिणें आरसीएफ पुलीस स्टेशनाच्या अधिकाऱ्यां कडेन संपर्क सादलो आनी बीएसडीपीएचए हांगाच्या सुकण्याक बंदखणींतल्यान सोडपाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
