भांगरभूंय | प्रतिनिधी
जायत्या जाणांक आपोल (अॅपल, सफरचंद) खावपाक आवडटा. हें गोड रुचीक फळ भलायके खातीरय म्हत्वाचें. तांबडें आपोल भलायके खातीर खूब बरें मानतात. तशेंच दोतोरय दिसाक एक आपोल खावपाचो सल्लो दिता. आपोलांत जीवनसत्व सी, फायबर, मिनरल्स आनी अँटी-ऑक्सिडंट्स आसतात. आपोल खाल्यार पोट भरून उरता आनी वजनूय वाडना. आपोलांत बऱ्या प्रमाणांत कॅलरीज आसतात.
वजन उणें करपाक मजत
दर दिसा आपोल खाल्यार पोट भरून उरता जें वजन उणें करपाक मजत करता. आपोलांच व्हड प्रमाणांत फायबर आसतात. तशेंच तातूंत उदकाचेय प्रमाण चड आसता. आपोल खाल्यार जेवणाचेर नियंत्रण दवरु येता. देखूनच वजन उणें करपाखातीर आपोल खावपाचो सल्लो दितात.
काळजा खातीर फायदेशीर
भरपूर फायबर आशिल्लो आपोल कोलेस्ट्रॉल उणें करपाकय मजत करता. ताका लागून कोलेस्ट्रॉल उणें जाता आनी काळजाची भलायकी सुदारता. आपोल खाल्यार कुडींत कोलेस्ट्रॉल एकठांय जायना.
पचन बरें जाता
पोटा संबंदीत समस्या आसल्यार तांणी आपोल खावचें. कारण तातूंत भरपूर फायबर आसता जाका लागून बद्धकोश्टता (कोठ्याची पिडा) जावपाची समस्या पयस जाता. आपोला पसून कुडीक बऱ्या प्रमाणांत पेक्टिन मेळटा.
रोगप्रतिकार शक्त वाडटा
आपोल खाल्यार रोगप्रतिकार शक्तय वाडटा. तुमची रोगप्रतिकार शक्त सुदारल्यार जायत्या दुयेंसां पासून पयस रावूं येता. तशेंच यकृत कुडींतल्यान विखारी पदार्थ काडून उडोवपाचें काम करता. यकृत डिटॉक्स करपा खातीर आपोल खाव येता.
गोडेंमूत जावपाची शक्यताय उणी
दर दिसा एक आपोल खाल्यार गोडेंमूत जावपाचोय धोको उणो जाता. सफरचंद खाल्यार गोडेंमूत जावपाचो धोको १८% उणो जाता अशें एका अभ्यासातल्यान दिसून आयलां. देखून दर दिसा तुमच्या आहारांत एका आपोलाचे सेवन करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
