भांगरभूंय | प्रतिनिधी
नवी दिल्ली, खबरां संस्था : भाजपाचे वरिश्ठ फुडारी एल के आडवाणी हांकां भारतरत्न जाहीर जालां. प्रधानमंत्री नरेंद्र मोदी हांणी शेनवारा सोशल मिडियाचेर ही घोशणा केली. आदले प्रधानमंत्री अटलबिहारी वाजपेयी उपरांत देशांतलो सगळ्यांत व्हडलो नागरी भोवमान मेळोवपी ते दुसरे भाजपा फुडारी.
मोदी हांणी बरयलां, ‘लालकृष्ण आडवाणी हांकां भारतरत्न दितात, हें सांगपाक म्हाका खूब खोस जाता. तांचे कडेन हांव उलयलों आनी तांकां परबीं दिली. ते तांच्या काळांतले सगळ्यांत मानाचे राजकारणी. देशाचे उदरगतींत ताणें दिल्लें योगदान कोणूच विसरूंक शकना. तळागाळांतल्यान सुरू करून ते देशाचे उपप्रधानमंत्री पदाचेर पावले. तेचपरी ते देशाचे गृहमंत्री आनी म्हायती मंत्री आशिल्ले. ताची संसदीय कार्यशैली सदांच आदर्श उरतली.
‘भौशीक जिणेंत आडवाणीजी जायत्या दशकां सावन पारदर्शकताय आनी प्रामाणीकपणाक दसून रावले. तांणी राजकी नीतीशास्त्राचो आदर्श घाला. राश्ट्रीय एकात्मता आनी संस्कृतीक पुनरुज्जीवन हांचे खातीर यत्न केल्यात. भारत रत्नान तांचो भोवमान करप हो म्हजे खातीर एक सामको भावनीक खीण. तांचे कडेन शिकपाची खूब संद मेळ्ळी म्हूण हांव सदांच स्वताक भाग्यवान मानतलों, अशें मोदीजीन म्हणलां.
हाचे आदीं 23 जानेवारीक बिहाराचे आदले मुख्यमंत्री कर्पूरी ठाकुराक भारत रत्न (मरणोत्तर) दिवपाची घोशणा जाल्ली.
आडवाणींची वळख
आडवाणी हांचो जल्म 8 नोव्हेंबर 1927 दिसा कराची (पाकिस्तान) शारांत जालो. 2002 ते 2004 ह्या काळांत अटलबिहारी वाजपेयींच्या सरकारांत ते उपप्रधानमंत्री आशिल्ले. हाचे आदीं 1998 ते 2004 ह्या काळांत एनडीए सरकारांत ते गृहमंत्री आशिल्ले. भाजपाच्या संस्थापक वांगड्यांतले ते एक. तांकां 2015 वर्सा पद्मविभूषण मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
