भांगरभूंय | प्रतिनिधी
पणजीः नुस्तेमारी वेवसाय मंत्री नीळकंठ हळर्णकर हांणी काल कांपाल मैदानाचेर ‘एक्वा गोवा मेगा फिश फेस्टिव्हल’ च्या 7 व्या आवृत्तीत आयोजीत ‘बिझनेस-टू-बिझनेस (B2B) स्टॉल, एक्वेरियम गॅलरी आनी परिशदेचें उक्तावण केले.
ह्या वेळार उलयतना मंत्री नीळकंठ हळर्णकर हांणी थळाव्या लोकांनी सरकारी येवजणांचो
लाव घेवन नुस्तेमारी वेवसाय क्षेत्रांत देंवपाचो आनी रोजगाराची संद निर्माण करपाचो उलो मारलो. सैमीक आनी शाश्वत पद्धतीन नुस्तेमारी करप तशेंच नुस्त्यांची निर्यात करतना गोंयांतलें नुस्तें खावपाचे प्रमाण हातूंत समतोल राखपाचीय गरज आसा आनी ते खातीर सरकार गरजेचीं पावलां उबारता, अशें तांणी सांगलें.
हळर्णकर हांणी सांगलें, ‘विकसित भारत’ ह्या प्रधानमंत्र्यांच्या संकल्पनेतल्यान नुस्तेमारी आनी हेर सुविधा विशीं नवीन तंत्रज्ञानाचो वापर करून नुस्तेमारी वेवसायांत सुदारणा आनी वाड करपाचो सरकार यत्न करता, जाका लागून गोंयांतले तरुण ह्या क्षेत्रात रोजगाराची संद निर्माण करपाक तशेंच दुसऱ्याक रोजगार दिवपाक शकतले. नुतेमारी वेवसायांतले शिक्षणीक अभ्यासक्रम सुरू करून कुशळ मनीसबळ तयार करपाक सरकाराचो यत्न आसा, अशेंय तांणी सांगलें.
नुस्तेमारी वेवसाय संचालनालयाच्यो संचालक डॉ. शमिला मोन्तेरो हांणी मानेस्तांक येवकार दिलो.
नुस्तेमारी वेवसाय संचालनालयाचे सचीव सरप्रीत सिंग गिल आनी नुस्तेमारी वेवसायांतले तज्ञ ह्या वेळार हजर आशिल्ले.
एक्वा गोवा मेगा फिश फेस्टिव्हल 4 फेब्रुवारी मेरेन चलतलो. फेस्टिव्हलांत विवीध प्रकारचें नुस्तें पळोवपाची संद मेळटले. तशेंच वेगवेगळ्या सर्तींचेय आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
