विकासाचो मार्ग दाखोवपी अर्थसंकल्प

भांगरभूंय | प्रतिनिधी

बायलां, शेतकार, तरणाटे, गरीब ह्या सगल्यांक अदमासपत्रकांत न्याय दिवपाचो यत्न केला. ह्या अदमासपत्रकांतल्यान ज्यो तरतुदी केल्यात ताचे वेल्यान परतून सत्तेर येवपाचें सपन मोदी सरकाराचें आसा.

केंद्र सरकारान बिरेस्तारा संसदेंत लोकसभा वेंचणुके पयलींच अंतरीम अर्थसंकल्प मांडलो. हातूंत गरीब, बायलां, तरणाटे आनी शेतकार हांचो विशेश उल्लेख आसा. तेच बरोबर 2047 मेरेन म्हणल्यार येता त्या सुमार 23 वर्सांत भारत विकसीत करपाचें ध्येय दवरलां. नागरिकांचेर ह्या अदमासपत्रकांत कसलेच कर घाल्ले नात. तशेंच आयकरांत कसलेच बदल लेगीत केल्ले नात. सहाजिकूच मध्यमवर्गीय आनी पगारदार हांकां ह्या अदमासपत्रकाचो फायदो जावचो ना. पुराय अदमासपत्रक जून वा जुलय म्हयन्यांत लोकसभेची वेंचणूक जाले उपरांत सादर करतले.
ह्या अर्थसंकल्पांत एक व्हड घोशणा केल्या. येता त्या पांच वर्सांत आनीक दोन कोटी घरां बांदतले. यूजीसीच्या अनुदानांत व्हड उणाव केला. तंत्रज्ञान मळा खातीर संशोधना खातीर एक लाख कोटी रुपयांचो विशेश निधी उबारतले. संरक्षणा खातीर भरीव तरतूद केल्या. ते खातीर सुमार 6.21 लाख कोटी रुपयांची तरतूद केल्या.
एकूण तरतुदींत फाटल्या वर्साचे तुळेन 27 हजार कोटींची वाड केल्या. चीन आनी पाकिस्तान हांचे लिपचोरयां हल्ले आनी घुसखोरी लक्षांत घेवन हें गरजेचेंच आशिल्ले. प्रदुशणाचो विचार करीत जाल्यार ई वाहनांक चार्जींग सुविधा पुरोवपाचेर भर दिला. अन्न आनी साऱ्याच्या अनुदाना खातीर 3.69 लाख कोटी रुपयांची तरतूद केल्या. खेलो इंडिया खातीर फक्त 20 कोटी रुपया दाखयल्यात. ही वाड सामकीच उणी आसा.
लखपती दिदी संख्या दोन कोटी वयल्यान तीन कोटी मेरेन व्हरपाचें सरकाराचें उद्दिश्ट आसा. आंगणवाडी सेविकांक भलायकी विमो दितले. अपरंपरीक उर्जा निर्मितीक सरकार प्रोत्साहन दितलें. जनगणे खातीर 1277.80 कोटी रुपयांची तरतूद करतले. सरकारी कर्मचाऱ्यांक प्रशिक्षणा खातीर कार्मीक मंत्रालयाक फुडल्या अर्थीक विकासा खातीर 310 कोटी परस अदीक निधी दिला.
देशांतल्या एक कोटी घरांचेर सोलर रुफटॉप पॅनल बसोवपाची येवजण जाहीर केल्या. ह्या अर्थसंकल्पांत मुंबयतले रेल्वे खातीर 15554 कोटी रुपयांची तरतूद केल्या. भारतीय रेल्वेचे 40 हजार नॉर्मल रेल्वेचें कोच वंदे भारत रेल्वेंत बदलतले. वंदे भारत रेल्वे सद्या लोकप्रीय आसा आनी तिका व्हड प्रतिसाद मेळत आसा. जाल्यार पीएम गती शक्ती उपक्रमा खाला ह्या कॉरिडॉराची बांदणी करतले. हाय ट्रॅफीक कॉरिडॉराक लागून प्रवासी रेल्वेचें संचलन अदीक गतीन आनी सुरक्षीतपणान जातलें. सेमी हायस्पीड रेल्वेची संख्या आनीक वाडयतले. देशांतल्या शारांनी मेट्रोचें जाळें उबारपाचेर भर दितले.
विमान येरादारी क्षेत्रांत बदल जातलो. धा वर्सांत विमानतळांची संख्या दुपेटीन जातली. नवे 149 विमानतळ उबारतले. टिअर 2, टिअर 3 शारांनी उड्डाण येवजण्यो राबोवपाचेर भर दितले. 517 नवे मार्ग आनी 1.3 कोटी प्रवासी आशिल्ल्याची आंकडेवारी मुखार आयल्या.
भलायकी विभागा खातीर 90668 कोटी रुपयांची तरतूद केल्या. कोरोना पसून सादूर रावपाचे नदरेंतल्यान ही वाड योग्य आसा. नौदळाचे सामुग्री खातीर 23 हजार 800 कोटी रुपया खर्च करतले. नौदळ गोदी खातीर 6830 कोटी रुपया खर्च करतले.
एफडीआय लेगीत 2014 ते 2023 मेरेन वाडला. मुळाव्या सुदारणां खातीर 75 हजार कोटी रुपयांची तरतूद केल्या. जून-जुलयांत पूर्ण अर्थसंकल्प येतलो तातूंत विकसीत भारताचो रोडमॅप मांडटले. मुळाव्या सुविधांचेर 11 टक्के चड खर्च करतले. वाडटी लोकसंख्या पळोवन समिती स्थापन केल्या.
एकूणच हो अर्थसंकल्प सरकाराचो आत्मविस्वास दाखयता. लोकसभेची वेंचणूक लक्षांत घेत जाल्यार कसलेच नवे कर लोकांचेर घाल्ले नात. बायलां, शेतकार, तरणाटे, गरीब ह्या सगल्यांक अदमासपत्रकांत न्याय दिवपाचो यत्न केला. ह्या अदमासपत्रकांतल्यान ज्यो तरतुदी केल्यात ताचे वेल्यान परतून सत्तेर येवपाचें सपन मोदी सरकाराचें आसा.
सुमार 80 कोटी लोकांक फाटलीं खूबशीं वर्सां फुकट धान्य दितात. ही येवजण तशें पळोवंक गेल्यार व्हड उपलब्धी आसा अशेंच म्हणचें पडटलें. संरक्षणाचेर आनीक तरतूद जाय आशिल्ली. ह्या अदमासपत्रका वरवीं अर्थ मंत्री निर्मला सीतारामन हांणी सेगीत सवो अर्थसंकल्प सादर केलाे. अर्थ मंत्र्यांनी फक्त 56 मिणटांत भाशण करून अर्थसंकल्पाचें वाचन केलें. आतां लोकसभेची वेंचणूक आसा. ती वेंचणूक जाले उपरांत जून-जुलयांत पुराय अदमासपत्रक सादर करतले. वेंचणुके पयलीं आत्मविस्वास पूर्ण अदमासपत्रक, तशेंच मध्यमवर्गियांक ना फायदो ना लुकसाण अशेंच ह्या अदमासपत्रका वयल्यान म्हणूंक येतलें.

शांताराम वाघ
9623452553