भांगरभूंय | प्रतिनिधी
सुयश प्रभुदेसायान अंदूंच्या हंगामांत नोंदयिल्लो तिसरो शेंकडो आनी के व्ही सिद्धार्थाच्या अर्द शेंकड्या नेटार गोंय पंगडान तमिळनाडू आड सुरू जाल्ले चार दिसांचे लडतीच्या पयल्या दिसा पयल्या डावांत 241 धांवड्यो केल्यो. सुयशान 104 धांवड्यो केल्यो जाल्यार सिद्धार्थान 69 धांवड्यांचें योगदान दिलें.
मॅच कालच्यान पर्वरी क्रिकेट अकादमीच्या मैदानाचेर सुरू जाली. अपेक्षे प्रमाण गोंयान हे मॅची खातीर तीन बदल करतना स्नेहल कवठणकार, वीजेश प्रभुदेसाय आनी प्रोफेशनल क्रिकेटर राहुल त्रिपाठी हांकां वगळावन तांचे सुवातेर मंथन खुटकार, लक्ष्य गर्ग आनी समर दुभाषी हांकां संद दिली. गोंयान टॉस जिखून पयलीं बॅटींग करपाचो निर्णय घेतिल्लो.
गोंयच्यो पयल्यो दोन विकेटी फकत 8 धांवड्यांचेर पडल्यो. इशान गडेकार परतून एकदा अपेशी थारलो. ताका खातें लेगीत उगडपाक जमलें ना. संदीप वॉरियरान ताका एलबीडब्ल्यू बाद केलो. ते उपरांत पुनरागमन करपी मंथन खुटकार (4) चड वगत खेळपट्टीचेर तग धरपाक शकलो ना. ताका लेगीत संदीपान बाद केलो.
ते उपरांत सदचे भशेन गोंयचो डाव दोनश्यां मेरेन व्हरपी सुयश प्रभुदेसाय आनी सिद्धार्थ हांची जोडी जमली. दोगांयनी तिसरे विकेटी खातीर 149 धांवड्यांची भागिदारी केली. अखेरेक ही जोडी अजिथरामान फोडली. ताणें सिद्धार्थाक बाद केलो. ते उपरांत सुयशान मुखेली दर्शन मिसाळा वांगडा मेळून चवथे विकेटी खातीर 48 धांवड्यांची भागिदारी केली. दर्शन बाद जाल्या उपरांत सुयश शेंकडो पुर्ण करून रोखडोच बाद जालो. ताका अजिथरामान बाद केलो.
4 बाद 233 धांवसंख्येचेर सुयश बाद जाल्या उपरांत गोंयच्या बाकीच्या बॅट्समनांनी फकत हाजेरी लायली. उरिल्ल्या स बॅट्समन फकत आठ धांवड्यांची भर घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
