भांगरभूंय | प्रतिनिधी
इंग्लंडा आड दुसरे टॅस्टीच्या पयल्या दिसा भारताचो ओपनर यशस्वी जयस्वालान गाजयलो. ताणें टॅस्ट कारकिर्दींतलो दुसरो शेंकडो नोंदयलो. ताचे बॅटिंगेक लागून भारतान पयल्या डावांत 6 विकेटी वगडावन 336 धांवड्यो केल्यात. जयस्वाल 179 धांवड्यांचेर खेळटा, जाल्यार आर आश्विन 5 धांवड्यो करून ताच्या वांगडा आसा.
हांगाच्या व्हाय एस राजशेखर रेड्डी क्रिकेट स्टेडियमाचेर भारतान टॉस जिखून पयलीं बॅटींग करपाचो निर्णय घेतलो. पूण, डावाची सुरवात करपाक देंविल्लो मुखेली रोहीत शर्मा हो निर्णय योग्य सिद्ध करपाक अपेशी थारलो. तो वैयक्तीक 14 धांवड्यांचेर बाद जालो. ताका पदार्पण करपी शोएब बशीरान बाद केलो.
शुभमन गिलान हे खेपे आक्रमक सुरवात केली. जितले बॉल खेळून रोहीत बाद जाल्लो, तितल्याच बॉलांनी गिलान आपलो स्कोर 30चेर पावयलो. पूण, परतून एकदा ताका बरे सुरवातीचो फायदो करून घेवपाक जमलो ना. जेम्स अॅण्डरसनाच्या बॉलाचेर ड्रायव्ह करपाच्या यत्नांत गिलान विकेटकीपराक कॅच दिली. गिल टॅस्टींत पांचवे खेपे अॅण्डरसनाच्या बॉलाचेर बाद जालो. दुसरे वटेन जयस्वालान सेगीत धांवड्यो करीत आसलो. जेवणाच्या विसवा पयलीं ताणें अर्द शेंकडो पुर्ण केलो.
तिनूय सत्रांनी भारतान 100 परस चड धांवड्यो केल्यो. मजगतीं, हार्टलीन अय्यराक बाद केलो. अय्यर बाद जाल्या उपरांत जयस्वालान पयलीं पाटीदार आनी उपरांत अक्षर पटेला वांगडा मेळून अर्द शेंकड्याची भागिदारी केली. पाटीकार फॉर्मांत दिसतालो. तो व्हड खेळी करतलो अशें दिशिल्लें. पूण, च्या च्या विसवा उपरांत बॅटींग करतना बॉल ताच्या ग्लोव्साक लागून विकेटींक आपटलो. ताका रेहान अहमदान बाद केलो.
अक्षर पटेल आनी श्रीकर भरत पयल्या दिसाचो खेळ सोंपपाक कांय वेळ बाकी आसतना बाद जाले. पूण, जयस्वालान एक बाजू सांबाळून धरली.
मजगतीं, ओपनर जयस्वाल टॅस्टीच्या पयल्या दिसा चड धांवड्यो करपाचे भारताच्या बॅट्समनां मदीं सुवात मेळयली. आदलो आक्रमक बॅट्समन विरेंद्र सेहवाग, वसीम जाफर आनी शिखर धवन सारक्या बॅट्समनांचे वळेरेंत जयस्वाल सवे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
