भांगरभूंय | प्रतिनिधी
नवी दिल्ली, खबरां संस्था : आपल्या बोल्ड लुकाक लागून सोशल मिडियाचेर फामाद आनी वादग्रस्त थारिल्ली अभिनेत्री आनी मॉडेल पुनम पांडे संवसाराक अंतरली. ३२ वर्सां पिरायेचेर तिका गर्भाशयाच्या कॅन्सराक लागून मरण आयलें. पुनमाच्या पंगडान इन्स्टाग्रामाचेर पोस्ट घालून तिच्या मरणाची म्हायती दिली.
१ फेब्रुवारीक रातचें गर्भाशय कॅन्सरा (सर्व्हायकल कॅन्सर) कडेन लढटना तिका मरण आयलें, अशें तिच्या वेवस्थापकान म्हणलां.
पुनमच्या सोशल मिडियाचेर केल्ल्या पोस्टांत अशें म्हणलां, ‘ही सकाळ आमचे सगळ्या खातीर कठीण जावन आसा. तुमकां सगळ्यां ही बातमी दितना दुख्ख जाता. आमच्या पुनमाक सरव्हायकल कॅन्सराक लागून मरण आयलें. तिका जे कोण मेळ्ळ्यात ते तिचेर मोग करताले. ही दुख्खाची वेळ आसा. तिणें शेअर केल्ल्या सगळ्या गजालींनी तिचो सदांच उगडास येतलो.’
मजगतीं, गोंयच्या चापोली धरण वाठारांत २०२० वर्सा न्यूड फोटोशूट आनी अश्लील चित्रीकरण केल्ल्या प्रकरणांत पुनमा आड कागाळ दाखल केल्ली. उपरांत हे विशीं २०२२ वर्सा गोंय पुलिसांनी आरोपपत्र दाखल केल्लें. नेम पाळिनासतना तिणें हें शुटींग केल्लें. हातूंत तिचो घोव सॅम बॉम्बे हाचोय हासपाव आशिल्लो. टॉपलेस जाल्ल्यान पुनम पांडे वादांत सांपडिल्ली. ‘नशा’ चित्रपटांत तिणें काम केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
