भांगरभूंय | प्रतिनिधी
कोची, खबरां संस्था ः केरळांतल्या न्यायालयान बिरेस्तारा 62 वर्सां पिरायेच्या एका मनशाक 2021 वर्सा आपल्या नेण्टे नातीचेर बलात्कार केल्ल्याचो गुन्यांव दाखल करून वट्ट 111 वर्सां बंदखणीची ख्यास्त फर्मायली. पूण ख्यास्त म्हणून ताका चडांत चड 30 वर्सां बंदखण भोगची पडटली. तशेंच न्यायालयान आरोपीक 2.1 लाख रुपया दंडय घाला. डिसेंबर 2021 वर्सा नाताळाच्या सुटयेंत चवथेंत शिकपी नेण्टे चली आपल्या आज्या कडेन रावपाक गेल्ले तेन्ना ही घडणूक घडली.
चड म्हायती प्रमाण, कागाळदारान पुलिसांक दिल्ले म्हायती उपरांत ही घडणूक उजवाडाक आयली. नाताळा वेळार नेण्टे चली ताचे कडेन रावपाक गेल्ले. तेन्ना घरांत कोण नासतना आज्यान तिचेर बलात्कार केलो. उपरांत ताणें ताका घडिल्लें कोणाकूच सांगचें न्हय अशी धमकी दिली. पूण पिडित चलयेन शाळेंतल्या एका इश्टाक हे विशीं सांगलें आनी मागीर ही म्हायती चाइल्ड सर्व्हिसेसाक दिली. उपरांत पुलिसांक कळयले आनी फुडली कारवाय केली.
मजगतीं, कांय दिसां आदीं केरळांतल्या मल्लापुरम वाठारांतल्या एका 42 वर्सां पिरायेच्या दादल्यान आपले नेण्टे चलयेचेर बलात्कार केल्ल्यान ताका 150 वर्सांची ख्यास्त फर्मायल्ली. आरोपीक तीन बायलो आसात. तांतूतल्या एके बायलेच्या सगळ्यांत धाकल्या चलयेचेर तांणे बलात्कार केल्लो.
पेरिंथलमन्ना फास्ट ट्रॅक स्पेशल कोर्टाच्या न्या. सिनी एसआर हांणी लैंगीक गुन्यांवांतल्यान भुरग्यांची राखण करपी (POCSO) कायदो, आयपीसी आनी बाल न्याय कायदो हांच्या तरतुदी खाला त्या मनशाक गुन्यांवकार थारायलो आनी वट्ट 150 वर्सांची ख्यास्त फर्मायली. पूण वयल्या प्रकरणांतल्या निकशा प्रमाण न्यायालयाच्या संकेतथळार अपलोड केल्ल्या आदेशा प्रमाण गुन्यांवकाराक 40 वर्सां बंदखणीची ख्यास्त भोगची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
