भांगरभूंय | प्रतिनिधी
नवी दिल्ली, खबरां संस्था ः आयआयटीच्या दोन विद्यार्थ्यांच्या आत्महत्या प्रकरणांत दाखल केल्ल्या याचिकां विशीं बिरेस्तारा 1 फेब्रुवारीक दिल्ली उच्च न्यायालयात सुनावणी जाली. परिक्षेंत बरे गूण मेळोवप म्हत्वाचें, पूण ती जिणेंतली सगळ्यांत म्हत्वाची गजाल न्हय हें आयआयटी विद्यार्थ्यांक समजावपाचो यत्न करप गरजेचें, अशें न्यायालयान म्हणलां.
न्या. रजनीश भटनागर ह्या प्रकरणाची सुनावणी करताले. तरणाट्यांच्या शारिरीक आनी मानसीक भलायकेचेर लक्ष दिवपाक जाय. हाका लागून विद्यार्थ्यांक जिणेंतल्या दर एका आव्हानाक तोंड दिवपाचो आत्मविस्वास मेळटलो, अशें तांणी सांगलें.
फाटल्या वर्सा आयआयटी- दिल्लीच्या दोन एससी विद्यार्थ्यांनी आत्महत्या केल्ली. हाचे उपरांत विद्यार्थ्यांच्या पालकांनी हे संस्थेचेर जातीभेदाचो आरोप करून एफआयआर दाखल केली. तशेंच न्यायालयांत याचिका दाखल करुन चवकशी करपाची मागणीय केल्ली.
चवकशी उपरांत पुलिसांनी सांगलें, संस्थेंत जाती भेदभावाचे पुरावे मेळूंक नात, पूण विद्यार्थ्यांक जायत्या विशयांनी अपेस आयिल्ल्यान तांचेर अकादेमींत बरी कामगिरी करपाचो दबाव आशिल्ल्याचें दिसून आयलें. विद्यार्थ्यांच्या पालकांनी केल्ल्या आरोपांक खात्रीचे पुरावे मेळूक नात. देखून जाती भेदभावाच्या प्रकरणांत चवकशी करपाचो आदेश दिवंक मेळना अशें न्या. भटनागर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
