भांगरभूंय | प्रतिनिधी
पणजीः गोंयांतल्या स्वयं काकोडकार (पिराय 15 वर्सा ) आनी अनन्या नायक (पिराय 14 वर्सा) ह्या शाळकरी भुरग्यांनी वैजकी क्षेत्रांत वापरपी सलायन प्रणाली खातीर पेटंट मेळयल्यात. तांच्या ‘सिस्टीम अँड मेथड फॉर सलायन लेवल नोटिफिकेशन’ हाका हालींच केंद्र सरकारच्या पेटंट कार्यालयान 20 वर्सां खातीर पेटंट जाहीर केल्यात. दोगूय मडगांवच्या मनोविकास शाळेंत शिक्षण घेतात.
स्वयं आनी अनन्या हांणी हाचे पयलीं ‘स्मार्ट सलायन’ ही एक आपचलीत अॅप आदारीत सलायन सुचोवणी प्रणाली विकसीत केल्ली. हे वरवीं दुयेंतीच्या सलायनची बाटली बदलपा खातीर आनी नर्सींनी हजर रावपा खातीर गरजेच्याे सुचोवण्यो दिवपाक शकतात. ह्या प्रणाली खातीर तांकां 2022 त नोयडांत जाल्ले राष्ट्रीय रोबोटिक्स सर्तींत रुप्यां पदक मेळिल्लें. तशेंच मार्च 2023 त जाल्ले राज्य पांवड्या वयले यंग इनोव्हेटर्स सर्तींत लेगीत दोगांयनी येस मेळयिल्ले.
सध्या बाजारांत स्मार्ट सलायनचे हेर अॅप उपलब्ध आसात. पूण स्वयं आनी अनन्या हांणी तयार केल्ल्या स्मार्ट सलायनांतल्या कावंटर वेट प्रणालीक पेटंट मेळप शक्य आशिल्ले. हे खातीर राज्य इनोव्हेटिव्ह कावंन्सिलान फुडाकार घेवन अशें पेटंट मेळोवपा खातीर मजत केली. उपरांत दोगांयनी लेगो आदारीत प्रणाली बदलून ते बदला इलेक्ट्रॉनीक चीप घालून नवे उत्पादन तयार केले. उपरांत तांची विवीध हॉस्पिटलांनी चांचणी घेतली. चांचणी येसस्वी जाले उपरांत पेटंट खातीर अर्ज केल्लो.
सिस्टीम अँड मेथड फॉर सलायन लेवल ‘नोटिफिकेशन’ लागून घरांत आनी हॉस्पिटलांत काम करपी भलायकी सेवा कर्मचाऱ्यांक व्हड मजत जातली. तांकां एका प्रकारान मजतीचो हात मेळ्ळा. ते खातीर तांचो मानसीक, शारिरीक तणाव उणो जावपाक मजत जातली. केंद्र सरकारच्या पेटंट कार्यालयान हे प्रणालीक पेटंट दिवन ताचे म्हत्व अधोरेखीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
