भांगरभूंय | प्रतिनिधी
-ताळगांवां डॉ. श्यामा प्रसाद मुखर्जी स्टेडियमाचेर
पणजी: गोंयांत 8 ते 10 फेब्रुवारी मजगतीं, दुसऱ्या आंतरराष्ट्रीय पर्यावरण आनी शाश्वतता परिशदेचे आयोजन केलां. ही परिशद ताळगांवां डॉ. श्यामा प्रसाद मुखर्जी स्टेडियमाचेर जातली. पर्यावरण मंत्री अॅलेक्स सिक्वेरा हांणी ही म्हायती दिली. बिरेस्तारा पर्वरी जाल्ले पत्रकार परिशदेंत ते उलयताले. ह्या वेळार गोंय प्रदुशण नियंत्रण मंडळाचे अध्यक्ष महेश पाटील आनी वांगडी सचीव डॉ. शमीला मोंतेरो हाजीर आशिल्ले.
8 वेर सकाळीं 10.30 वरांचेर परिशदेचें उक्तावण मुख्यमंत्री डॉ. प्रमोद सावंत आनी केंद्रीय पर्यावरण मंत्री भूपेंद्र यादव हांचे हस्तुकीं जातले. आदले केंद्रीय मंत्री सुरेश प्रभू हे बीजभाशण करतले. परिशदेची संकल्पना शाश्वत फुडारा खातीर वर्तमान घडोवप ही आसतली. परिशदेंत पर्यावरण पूरक काम करपी कंपनी, संस्थांच्या येसाची म्हायती दितले, अशें मंत्री अालेक्स सिक्वेरा हांणी सांगलें.
परिशदेंत कार्बन उत्सर्जन उणे करप, हरीत क्रेडीट, शाश्वत खणकाम, सर्क्युलर इकॉनॉमी, उद्देगांत हरीत तंत्रज्ञानाचो वापर, उदक सुरक्षा आनी जैवविवीधतायेचे संवर्धन अशा विवीध विशयांचेर चर्चा सत्रां आनी व्याख्यानां आयोजीत केल्यात.
ह्या वेळार भारताच्या मुख्य वैज्ञानीक सल्लागार डॉ. सपना पोटी, डॉ. प्रदीप सरमोकादम, डॉ. क्लावड अाल्वारीत, डॉ. पंकज कुमार दिव्या शर्मा, शिखर जैत, रुहान जरीवाला, एकता नारायण, मुदीत जैन, एन. मुथुसेझियान, रजत वर्मा, अवधेश झा, अविजीत घोष, एस. ए. सुंदरसेन, विवेक तलवार, रेवा प्रकाश हे मार्गदर्शन करतले.
ग्रीन बिल्डींग विशीं प्रदर्शन
परिशदे मजगतीं, प्रदर्शनाचे आयोजन केलां. हातूंत पर्यावरण विशीं 50 स्टॉल्स आसतले. प्रदर्शनांत ग्रीन बिल्डींग ह्या विशयाचेर भर दिला. हें प्रदर्शन सगल्यां खातीर उक्ते आसून विद्यार्थ्यांनी हाचो लाव घेवचो, अशें महेश पाटील हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
