भांगरभूंय | प्रतिनिधी
भांगरभूंय । खबरां संस्था
पणजीः पोरण्या गोंयांत बिरेस्तारा सांजे वर्सुकी मोन्टे संगीत महोत्सव सुरू जालो. शेनवार 3 फेब्रुवारी मेरेन तो चलतलो. फुंदासांव ओरिएन्ट आनी सिदाद दे गोवा हांच्या जोड पालवान अवर लेडी ऑफ मोन्टे हांगचे दोंगुल्लेच्या दायज वाठारांत जातलो. 4 फेब्रुवारीक बाणावली हांगा ताचो समारोप जातलो. संगीत, नाच, सांस्कृतीक दायजा खातीर नामना मेळयल्ल्या ह्या संगीत महोत्सवांत भारतीय आनी आंतरराष्ट्रीय कलाकार आपल्या कलेंचें सादरीकरण करतले
पाश्चिमात्य आनी भारतीय शास्त्रीय संगीत कलाकारां मदीं संवाद घडोवन हाडपी व्हो संगीत महोत्सव 2002 वर्सा फुंदासांव ओरिएन्टान नोसा सेन्होरो दो मान्टे ह्या 16व्या शेंकड्यांत चॅपेलचें नूतनीकरण केल्या उपरांत सुरू के्ललो. भारतीय आनी पाश्चिमात्य संगीताचो मेळ घालप व्हो संगीत महोत्सव घडोवन हाडपा फाटलो मुखेल हेत आसा. दर वर्सा नामनेचे संगीत कलाकार ह्या महोत्सवांत आपली कला पेश करतात. विशेश म्हणल्यार महोत्सव सगल्यां खातीर उक्तो आसता.
महोत्सवाच्या पयल्या दोन दिसांत सतारवादक डॉ स्विकार कट्टी सतारीचेर सुगम संगीत सादर करतलो. भारतीय आनी पोर्जुगीज नाच कार्यावळ जातली. 4 फेब्रुवारीक बाणावले हांगा सेंट जॉन बाप्तिस चर्चींत महोत्सवाच्या समारोप कार्यावळींत परंज्योती अकादेमी कोरस आनी कॅपेला ग्रुपाचे 34 वांगडी कार्यावळ सादर करतले.
पोरण्या गोंयांत महोत्सवाचे सुवातेर अवर लेडी ऑफ मोन्टी चॅपेल वाठारांत गाडयो पार्क करून दवोरपाक मेळच्यो नात. संगीत मोगींनी गांधी चौकांतल्यान दवरल्ल्या शॅटल सेवेचो उपेग करचो अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
