अर्थसंकल्प विशेश ः अर्थमंत्री निर्मला सीतारमण हांच्या भाशणांतले म्हत्वाचे मुद्दे
भांगरभूंय | प्रतिनिधी
नवी दिल्ली, खबरां संस्था ः केंद्रीय अर्थमंत्री निर्मला सीतारमण हांणी आयज संसदेंत मोदी सरकाराच्या दुसऱ्या कार्यकाळाचें अंतरीम अर्थसंकल्प सादर केलो. तिणें सेगीत सवें खेपे देशाचो अर्थसंकल्प सादर केलो.
अर्थसंकल्प वेळार मांडिल्ले कांय मुद्दे –
- येवपी काळांत मोदी सरकाराचें बोधवाक्य ‘जय जवान, जय किसान, जय विज्ञान आनी जय अनुसंधान’ अशें आसतलें.
- भारत हो सगल्यांत चड दूद निर्मिती करपी देश आसलो तरी भारतीय गोरवांची दूद निर्माण करपाची तांक उणी आसा.
- आमी गरीब, बायलो, तरणाटे आनी शेतकार अशा चार ‘जातीं’चेर लक्ष केंद्रीत केलां. तांच्यो गरजो, महत्त्वाकांक्षा आनी उदरगत ह्यो गजाली आमच्या प्राधान्यक्रमाचेर आसात. देशाची उदरगत तांचे उदरगतींत लिपल्या. आमी तांच्या कल्याणा खातीर काम करतात.
- 2014 पयलीं आमी खंय आशिल्ले आनी आतां खंय आसात, हाचे कडेन पळोवपाची गरज आसा. त्या वर्सांनी कितलो गैरकारभार जालो, हें पळोवन ताचे पसून धडो घेवपाची गरज आसा. ते खातीर केंद्र सरकार सभाघरांत श्वेतपत्रिका सादर करतलें.
- नवे कररचनेंत वर्साक ७ लाखां मेरेनचें उत्पन्न आशिल्ल्या करदात्यांक कसलोच कर भरचो पडचो ना. करपात्र उत्पन्नांत ३ टक्क्यांची वाड.
- स्किल इंडिया मिशना खाला १.४ कोटी तरणाट्यांक प्रशिक्षण दिलां. तशेंच ५४ लाख तरणाट्यां मदीं कुशळटाय विकास घडोवन हाडला. ३ हजार नव्यो आयटीआय सुरु. ७ आयआयटी, १६ आयआयआयटी, ७ आयआयएम, १५ एम्स आनी ३९० विद्यापीठांची स्थापना.
- ‘लखपती दीदी’ येवजणेचो आवाको दोन वयल्यान तीन कोटीं मेरेन वाडयतले. 9 कोटी बायलो हे येवजणेक लागून स्वावलंबी जाल्यात. अंगणवाडी कार्यावळींक गती दिवप चालू आसा. आतां मेरेन एक कोटी बायलांक ‘लखपती दीदी’ केलां.
- प्रधानमंत्री आवास येवजणे खाला फुडल्या पांच वर्सां भितर आनीक दोन कोटी घरां बांदतले. आमचें लक्ष पारदर्शक कारभार करपाचेर आसा.
- 80 कोटी लोकांक फुकट रेशन येवजणेचो फायदो जालो.
- सामान्य लोकांच्यो गरजो आनी इत्सा पुराय करपाचो यत्न केलो.
- 25 कोटी लोकांक गरिबींतल्यान भायर काडपाक येस आयले.
- प्रधानमंत्री जनमन येवजणेचो आदिवासी समाजाक व्हड प्रमाणांत फायदो जालो.
- अन्नदाता येवजणेचो थेट 11.8 कोटी शेतकारांक फायदो जालो.
- जीएसटीक लागून ‘एक देश, एक कर, एक बाजार’ ही संकल्पना साकार जाली. तशेंच देशांतल्या उद्देजकांक व्हड फायदो जालो.
- फाटल्या धा वर्सांत मोदी सरकारान म्हारगाय नियंत्रणांत हाडली.
- देशभरांतल्या हॉस्पिटलांनी वैजकी म्हाविद्यालयां सुरू करतले.
- गर्भाशयाच्या कॅन्सराक आळाबंदा हाडपा खातीर चलयांक ल्हान पिरायेचेर लस दितले.
- शेतकी लुकसाण जाल्यार मजत दिवपी येवजण्यांनी आनीक सुदारणा जातली.
- येवपी काळांत आत्मनिर्भर तेलबियांची मोहीम चालीक लायतले.
- दुदाचो वेवसाय घटमूट करपा खातीर सरकारान रणनिती आंखल्या.
- नुस्तेमारां खातीर ५ इंटिग्रेटेड अॅक्वागार्डची निर्मिती करतलें.
- 9 कोटी बायलो उद्देजक देशाचे उदरगतींत योगदान दितात. तांचो भोवमान करतले.
- तरणाट्या पिळगे खातीर 1 लाख कोटी उद्देग निधी मंजूर जातलो. हातूंतल्यान 15 वर्सां उण्या व्याजाचें रीण तरणाट्यांक उद्देग सुरु करपा खातीर दितले.
- तरणाट्यांनी डीफफेक तंत्रगिन्यानांत काम करचे आनी सुरक्षा वेवस्था घटमूट करची हे खातीर सरकार यत्न करतले.
- तंत्रगिन्यानाचेर आदारिल्ल्या येवजण्यांचेर 11.1 टक्क्यांनी पयशे वाडटले. ह्या येवजण्यां खातीर 11.11 हजार कोटी रुपया मंजूर करतले.
- देशांत 7 नवे आयआयटी आनी 7 आयआयएम उबारतलें.
- सध्याच्या म्हत्वाच्या एक्सप्रेस रेल्वेंचे 40 हजार डबे ‘वंदे भारत’ सारके करतले.
- भारतीय विमान कंपन्यांनी फाटल्या कांय वर्सांत 1000 नवी विमाना खरेदी करून हवाई येरादारीची गती वाडयल्या.
- धा वर्सांत विमानतळांचो आंकडो दुपेटीन वाडला.
- इलेक्ट्रीक वाहनां खातीर इको सिस्टीम तयार करपाचेर सरकार लक्ष केंद्रीत करता. सरकार आतां अशा वाहनांचो वापर वाडोवपाचेर आनी ई-चार्जिंग स्टेशनां वाडोवपाचेर भर दितलें.
- देशांतल्या पर्यटन मळार उदरगत करपा खातीर सरकाराचो यत्न आसा. भारताच्या दायजाचेर, इतिहासीक थळांचेर भर दितले.
- सरकार आपल्या जुंव्यांची उदरगत करपाचेर लक्ष केंद्रीत करता. तातूंत लक्षद्वीपाचो आस्पाव आसा.
- राज्य सरकाराच्या समन्वयान उदरगतीच्या कामां खातीर 75 हजार कोटी रुपयांचो वेगळो निधी दवरला.
- विकसीत भारताचो रोडमॅप तयार करतले आनी तो सगळ्यां मुखार दवरतले.
- 2024-25 वर्साचें अर्थसंकल्प 30.80 लाख कोटी रुपया आसपाचो प्रस्ताव आसा.
- नव्या कर पद्दती प्रमाण 7 लाखां मेरेन येणावळीचेर कर ना.
- कर वेवस्थेंत नवो बदल जावंक ना. सध्या जशें आसा तशें कर भरचो पडटलो.
- 25 हजार मेरेन डायरेक्ट टॅक्स डिमांड परत घेतले. हाचो थेट 1 कोटी लोकांक फायदो जातलो.
39.आमी एक नवी संकल्पना घेवन देशाची उदरगत करपाचे आसात. हें आमचें प्राधान्य.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
